بەلێ عیراقێ بون واتایا ھندێ ددەت کو مروڤ کێلانێ د ناڤ ئاڤێ دا بکەت و وەکی رێسانا پیرێ یە دەمێ ل سەرێ سوبێ ھەتا ئێڤارا درەنگ تەشیێ درێسیت و ل داویێ تلەکێ تێھەلددەت . بەلێ ل گەل عیراقێ مان ئەوە وەکی رومانا (مشکەکان و مروڤەکان یا نڤیسەر جون شتاینبێک ) دا ھاتی دەمێ کاندیێ پیر و کال ب دەنگەکێ نەرم و بێھز ڤە شیرەتێ ل جورج و لینی دکەت و دبێژیت (ھەر ژ روژا خودێ ئەز دای , ئەز خوەدیێ ئەردێ خوە نەبومە , چەند خوشە رێڤەبرن و بەرھەم ل زەڤیێ دا یا مروڤی بیت . ئەرێ لاوێن من , زەڤی نەمایە ل ڤی وەلاتی من کار تێدا نەکری و بەرھەم نەچاندی , بەلێ ھەردەمێ من دریبیت بەرھەم یێ من نەبویە ) . ئەڤەیە نەبونا وەلاتی. ھەر ژ روژا عیراق بویە عیراق کوردی خێر خونەدیتیە و ھەر ب شەقە سەر بویە و بێ مفا بویە , بەرھەم بو وی نەبویە . درێژەدان ب گوتارا خوە کو پشکا ئێکێ بەری ڤێ ل سەر دەردێن عیراقێ بلاڤبویە . بەلێ :
- ب راستی دەردە ب ھەمی پیڤەرا مەرکەز ل گەل وەلاتێن دەردور ئێک بگریت , ل دژی گەلێ کورد و ل ئالیەکێ دی ب ھەمی دەنگێ خوە بێژی ئەم براێن ئێکین !
- نێ دەردە تو بێژی کورد و عەرەب شریکن ل ڤی وەلاتی و وەکی دی ئەز سەد و بیست و ئێک دەرەجا دیری تە بم .
- دەردە ل گەل عیراقێ بون , کی شەری بکەت عیراق بیت یان تیرور بیت یان گەل جیرانا بیت یان گەل کوردان بیت ھەر کوردستان مەیدان بیت و کورد ژی (وەقودێ ئاگری بن )
- نێ دەردە و دل رەقی بو دەمێ ل سالا ١٩٦٩ کو ل ئەشکەفتا دەکان بێن سوتی ب سەر کوردستانێ بەردای ل سوتنا زاروو و پیر و کال و لاوا .
- دەردە قوربان دەمێ فەقیر بی رێڤی بی و دیڤدا شێرێ خوین خور بوی . ژ بلی خیانەتێ ل سوزێ.
- قوربان تە چو نەما ل گەل من نەکەی , ئەرێ نەتوبوی ل سالا ١٩٧١ تە مەلا تێنتی کرن و تیرورا جەنیرالی دای؟ بەلێ توبوی تە ھەمی پیروزی بن پێکرن . بوچی ؟ بو ھندێ کورد و کوردستان ئازاد نەبن .
- دەرد بو قوربان تە نامیس ب ھشکاتی و ئاڤە فروت ل سالا ١٩٧٥ بەس دا کوردان دەربەردەر بکەی .
- چو دەردمانە کو ڤان زالما ل سەر ئاخا کوردستانێ نەرێشتی . نێ ھەر وەکی ڤان بناڤێ قورئان و حەدیسێ (ئەنفالێ ) جیھاد بسەر مزگەفت و حەجی و حیجاب و ێوفیێن مەدائینان .
- دەرد بو دەمێ تە بێ شەرم دگوت ( مە ئەو گەھاندنە سزایێ و بەرەف جەھنەمێ ھنارتن ) نێ ئەڤە دەردە ئەگەر ژ بیر بکەین .
- واللە دەردبو دەمێ تو بویە ئەگەر , پیرێ کو ل چیای و لاوێ خوەدی خەون و زارویێ بەستە زمان , ئاڤا شرین ب یا سویر و ھینیاتێ ب گوریێ و سێبەرا گویز و بەریێ ب خرینکێ بگوری .
- دەرد مەزنتر بو ل سالا ١٩٨٨ دەمێ ل بێنا سێڤێ تە ھزارا کەس بێ دەنگ کرن , بوچی ل ھەمی دونیایێ بێنا سێڤێ خەو و خەونێن خوش بدیف دا دئێت ؟ بوچی دەف من واتایا مرنێ ددەت ؟
- دەردە دەمێ ل بەر توپ و تەیارا کوچا ملیونی بکەم , و وەلات نەبیت خو تێدا بحەوینم و رینم و دەردە بێمە فروتن ب سیک و مەزادا ئاشکرا .
- قوربان دەردە ب (سەرێ قەلەمەکێ ) کوردستانێ پێخیە برسێ دا .
- ل ھەمیا دەرد تر کو تمام نابن ئەو , کوشتن و ئەنفال و جینوساید و کیمیابارن و سێدارەدان و بێ بەھر بون ل مافێن مەدەنی و سیاسی و جڤاکی و ئابوری و سەربازی و دینی و مروڤایەتی و سەدان ھزار بنپێکرنێن دی ژی ... ھندەک ھەبن بێژن عیراق وەلاتە و زڤرین بو بەغدا باشترین دەرفەتە !!

ئەڤ دووگوتارە ل سەر وان تاوانێن عیراقێ کری بەرامبەر کورد و کوردستانێ . بیرئینانا ڤان تاوانان فەرە ببیتە ھەڤێنی ئێکگرتنێ ناڤبەرا ھەمی ئالیی و پێکھاتێن کوردستانی . چونکی ئەڤ وەلاتە وەکی وێ کەشتیێ یە کو پێغەمبەرێ مە (سلاڤ لێ بن ) د بێژیت ( ...ئەگەر یێن قاتێ سەری رێک دا یێ بنی کەشتیێ کون بکەت بو ئاڤ ھەلکێشانێ, وی دەمی ھەمی پێکەڤە دێ بن ئاڤا بن ) . باشترین گروڤە ژی ئەو دەمێ رژێمێن ئێک ل دیف ئێکێن عیراقێ ب یێن نھا ڤە ژی . چو جاران ھزر ژ ھندێ نەکریە کو جوداھیێ ل دەڤەرەکێ بو دەڤەرەکی و ئالیەکێ بو ئالیەکێ و پێکھاتەکێ بو پێکھاتەکێ بکەت . ب مەرجەکێ ببیە جاش و مەفرەزە خاسا رژێمێ !
ل داویێ زور گرنگە :
• حکومەتا ھەرێما کوردستانێ ب ھەمی شیان ڤان تاوانێن دژی مروڤاتیێ بکەتە دیکومێنتەری و ب رەنگەکێ باش کار ل سەر بەکەت داکو ھەمی دونیا شاھدێ وان تاوانا بن کو ل دژی کوردان ھاتیە کرن .
• ئەرکێ ھەمی نڤیسەر و راگەھاندنکار و سیاسی و ئەکادیمی و شارەزا و خوەدی پیشەیەکێ یەکو ب جدی کار بکەت ل سەر ڤان کەیسان و بو گەنج سنێلێن کوردستاێ کو زور ژ وان ئەڤ نەخوشیێ ھایژێ نەبوینە و ھەروەسا کار بێتە کرن ل سەر ئاستێ جیھانێ ژی.
• دەرمانێ ڤان برینا ھەمیا ئەوە کو ھەمی کورد و کوردستانی ب ئێک دەنگ بەرەف سندوقێن ریفراندومێ بچن و ب (#بەلێ ) بو سەربەخویێ دەنگی بدەن , بو دووبارە نەبونا ڤان تاوانێن ھوڤانە .
• ریکخستنا ناڤ مالا کوردی دێ ھاریکار بیت کو برین ب سەربەخویێ ساخ لەم ببن .