د یرۆکا گەلێ گورد ب گشتی و بزاڤا رزگاریخوازا نەتەوی و نشتیمانیا کوردستانی دا بتایبەت درۆژێن تەنگ و تاری دا دەرباز بوونە ، ژبەرکۆ وەلاتێن داگیرکەر ب درێژاھیا دیرۆکێ کوردستان و خەلکێ کوردستانێ ژ ھەمی رۆیەکی ڤە دوورپێچ کربوو و جیھان ل خەلک و وەلاتی کربوو تۆنێلەکا تەنگ ، دەرگەە و پەنجەرێن لێدانا تافا رۆژێ ژی بوو نەھێلابوون ، لێ ئیرادا گەلێ کوردستانێ بۆ دەربازبوون ل وێ تاریاتیێ د پۆلایینی بوون و ب پلان و بەرنامێن بزاڤا رزگاریخوازیا گەلێ کورد نەخاسمە پارتی دیموکراتی کوردستان و سەرۆک مەسعوود بارزانی ، ل ھەرچار ئالیا دەرگەە ڤەکرن و ب خەبات و قوربانیدانا خەلکێ کوردستانێ و ھیممەتا پێشمەرگەھێن کوردستانێ ، کوردستان دێ بیتە گەشترین وەلات ل رۆژھەلاتا ناڤین و رۆژێن دژوار وەک بن دەستیێ و ئەنفال و کیمیاران و جینۆسایدکرنێ بسەر گەلێ کورد بوونە پشکەک ژ دیرووکێ . گەھشتن بڤێ ئازادیێ و ئاڤەدانیێ دکاودانێن ھەرە دژوار و ئەڤرازیێن ڕک ب خەبات و قوربانیدانا ھزارەھا خەلکێ کوردستانێ دەرباز بوون ، رۆژێن ڕەش و تاری پڕ فەنەر کرن ، قوناغا داھاتی یا گەلێ کورد کۆ قوناغا راپرسی و سەرخۆبوونا کوردستانێ دووماھی قوناغ و سەربوورا گەلێ کوردە بۆ گەھشتن ب مافێن خۆ یێن ڕەوا و بدەستڤەئینانا سەروەریێ ، ئەڤ قوناغە ژی بەرامبەر قوناغێن گەلێ لبەرێ دەرزابکری یا بێ زەحمەت و قوربانیدانە و مەزنترین خەتیر و فەنەرە کۆ سەرانسەرێ ھەرێما کوردستانێ ب ئاخ و خەلک و مالڤە روون بکەت و ئەگەر ل رووناھیا ئاگرێ نەورۆزێ مەزنتر نەبیت کێنتر نیە ، ئەگەر گەلێ کوردستانێ ب گەرنەڤالێن جەماوەری لرۆژا ٢٥ ێ ئیلونا ئەڤ سالە ب دەنگێن بەلێ پشکداریێ ل راپرسیا سەرخۆبوونا کوردستانێ دا بکەت ، ئەڤ رووناھی یە بۆ ھەتا ھەتا ل کوردستانێ دێ یا بریسقەدار بیت و چ جار ناھێتە ڤەمراندن ، لەوما یا فەر و گرنگە خەلکێ مە بڤێ ھەستێ بەشداری راپرسیێ ببیت ، بەلێ بڤی رەنگی ژھەمی لایەکی ڤە کوردستان دێ یا روون و گەشەداربیت و پرۆسێن ئاڤەدانیێ و پێشکەفتنێ دێ کەڤنە دوارێ بجە ئینانێ دا و تەم و مژا رۆژێن بووری دێ بسەر داگیرکەر و نەحەوێن سەرخۆبوونا کوردستانێ دا چن و خەونێن دژبەرێن سەرخۆبوونا کوردستانێ یێن ناڤخۆ و دەرڤە دێ گۆر ب گۆر بن . ئەز باوەرم پرانیا خەلکێ کوردستانێ ل رۆژا راپرسیێ دێ ھزر ل رۆژێن تاریک و دژوار و خوینا ھزارەھا شەھید و ئەنفالکریا و جینۆسایدکرنا خەلکێ کوردستانێ کەت لسەر دەستێ دوژمن و داگیرکەر و گرێگرتیا . گەلێ کورد گەھشتیە وێ راستیێ کو ھەمی دەرگەھێن مانەڤا کوردستانێ دگەل عیراقێ ھاتینە گرتن و باوەری ب سەرکردایەتیا خۆ ھەیە کو ئاییندەکێ گەش و روون لپێش خەلکێ کوردستانێ یە و ب ھیچ رەنگەکی گوھدارایا پروپاکندێن دیڤەلانکێن داگیرکەرا ناکەت یێن ھەول ددەن دووبارە گەلێ کوردستانێ ببەنەڤ دناڤ تاریستانەکا دیتر دا بۆ بەرژەوەندێن تایبەت و حزبی .