پشتی بریارا سەرۆکێ ھەرێما کوردستانێ و حزبێن نشتیمانی یێن کوردستانی لسەر ئەنجامدانا راپرسیێ ، داکۆ خەلکێ کوردستانێ د پرۆسەیەکا دیموکراسی و ئاشتیانەدا بریارێ لسەر ئاییندێ سیاسی یێ کوردستانێ بدەت ، ئەرێ دگەل عیراقێ بمینیت یان ببیتە دەولەتەکا سەربخوو و ل عیراقێ جودا ببیت . بناڤێ دیموکراسیێ و ئازادیا رەئی دەربرینێ ، ل سنوورێ پایتەختێ رەوشەنبیری ژمارەکا کێما دەنگێن نەراز دژی ئەنجامدانا راپرسیێ سەرھەلدایە و ھەول دھێنەدان کەمپینە دژی ڤێ پرسا نشتیمانی و دیموکراسی پێک بئینن . ھەرچەندە ئەڤ کەسایەتی و ئالیێن بڤێ ھەولێ رادبن رەنگە دیموکراسیەتێ بۆ خۆ بکەنە چارچۆڤە ، لێ بنەرەت دا دژبەریا گەلەکێ زۆلم لێکری مینا گەلێ کورد کو پشتی بسەدان ھزار شەھید و قوربانیا و ئەنفال و کیمیابارن و جینۆسایدکرنێ ، مافێ سەرخۆبوونێ لێ ھاتبیە زەفتکرن و دەرفەتا بدەستڤەئینانێ نەبوو ، ئەڤرۆ ھەول ددەت ب ئاشتیانە ڤی مافێ رەوا بزڤرینیت ، گاڤەکا نە دیموکراسیە دژی بریار و بەرژەوەند و ھیڤیێن ملیونەھا خەلکێ کوردستانێ و چەندین سالە خەونا پێڤە دبینن . ئەگەر راستە ئەو کەس و ئالی و سازیێن دژایەتیا راپرسیێ دکەن خۆ ب دیموکراسی ھژمار بکەن پێتڤی یە بەری ھەر کەسەکی داکۆکیێ ل بەستڤەئینانا مافێن مللەتان بکەن ، نەخاسمە مافێ مللەتێ خۆ . چونکی مللەتێ کورد و بزاڤا رزگاریخوازیا کوردی ل عیراقێ ل دەسپێکا دامەزراندنا دەولەتا عیراقێ ب ئاشتیانە داخازا مافێن خۆ کریە ل مافێن رەوشەنبیری و پەروەردەیی دەستپێکریە ھەتا ئۆتۆنۆمی و فیدالی ، لێ رژێمێن عیراقێ یێن ئێک لدیف ئێک ھەمی رێکێن پێکڤە ژیانا کوردان دگەل عەبەران لعیراقێ گرتیە و ھەردەم ب وەلاتیێن پلە دوو کێمتر ھژمار کرینە و سەرەدەری دگەل کریە . مخابن لجھێ ھندێ ھندەک سەرمایەدارێن کورد یێن مینا ( نە شاسوار عبد الواحد) مینا سەرمایەداێن ئسرائیلی سەرمایێ خۆ ژپێخەمەت سەروەری و سەرخۆبوونا وەلاتی بکار بینن ، بەرۆڤاژی بکار دئینن . پشتی گەلێ کورد ھەمی شێوازێن دەسھەلاتداریێ و پێکڤە ژیانێ دگەل عیراقێ بکار ئینای و سەرنەگرتی ، ئەڤرۆ ب نەچاری داخازا سەرخۆبوونێ دکەت ، ب دیتنا من ئەڤە راپرسیە راپرسیا سەرخۆبوونێ یە نەک جودابوونێ ، چونکی نەتەوا کورد و جوگرافی و خەلکێ کوردستانێ چ جاران بەشەک نەبوونە ل عیراقێ ، ژلایێ زمان و کلتوور و دابن و نەریتان ، یان جوگرافیا کوردستانێ ب رەنگەکێ ئەزەلی دگەل عیراقێ یێ جودایە . ئەڤرۆ دەمێ سەرکردایەتیا سیاسی یا کوردستانی داخازا راپرسی و سەرخۆبوونێ دکەت نابیت ب گاڤەکا حیبەتی ببینین چونکی مافەکا سرۆشتی یە و پشتی خەبات و قوربانیێن ھندە سالا ، خۆشبەختانە سەرۆک بارزانی و دبلۆماسیەتا کوردستانی شیا دەرفەتا سەرخۆبوونێ برەخسینیت و پشتەڤانیا نیڤ دەولەتی بۆ پەیدا بکەت . ب تایبەت پشتی سەرکەفتنێن پێشمەرگەھێن کوردستانێ بسەر تیرۆرستێن داعش یێن بناڤێ دەولەتا ئیسلامی و ھەلوەشیا دەولەتا برەنگەکێ پراکتیکی و دەسھەلاتا عیراقا شیعی عیراق کریە ھەرێمەکا ئیرانی و فەرمانێن ھندەک مەرجەعیەت و سەرلەشکرێن ئیرانێ وەردگرن مینا قاسم سولەیمانی ، کۆ بدرێژاھیا دیروکێ دژبەرێن مافێن گەلێ کورد و ئازادیێ و دیموکراسیێ بوونە . لەوما دژایەتیا راپرسی و سەرخۆبوونا کوردستانێ ب ھیچ رەنگەکی ناچینە دناڤ پرنسیپێن دیموکراسیەتێ و مافێ مرۆڤ نەخاسمە ئەگەر ئەو دژبەر ل ھەمان نەتەوە بن و دناڤ ھەمان نشتیمان بژین .