ھەر جارا دەمێ بەحس ژ ئەزمونێ حوکمرانیا کوردستانێ دئێتە کرن , ئاراستە و رەخنە و شروڤە و ھەلسەنگاندنێن جودا جودا دئێنە بەرچاڤ . بەلێ ئەو تشتێ کو ھەمی ئالیی ل سەر ئێک ھەلویستن ئەوە کو ھەمی پێکھاتێن ئولی و مەزھەبی و نەتەوەی ل کوردستانێ دا بێ جوداھی ل ئەرک و مافان دا پێکڤە دژین و دوست و دوژمنێن کوردستانێ شاھدێن ڤێ ئێکێ نە و ھەتا نھا ژی تایبەت دەمێ رێکخراوا تیرورستیا داعش ھاتی جھێ کو بیە وارێ پێکڤە ژیانا ھەمی ئول و نەتەوە و پێکھاتێن جودا ھەر کوردستان بو , ب خالەکا پوزەتیف بو سیستەمێ حوکمرانیا کوردستانێ ل سەر ئاستێ نافخوی و ھەرێمی و نێڤدەولەتی دئێتە ھژمارتن.
بەردەوام پێکھاتێن کوردستانی ل شورەش و سەرھلدانێن کوردستانی د گەل رزگاری و سەربەخویا کوردستانێ بوینە و چو جارەکێ ھەست ب ھندێ نەکریە کو خوە ژ ھێلا پێشیێ ژ خەباتێ دوور بکەن .
ل سالا ١٩٩٢ دەمێ حکومەت و پەرلەمانێ کوردستانێ ھاتیە دامەزراندن , ژ کارێن ھەرە پێشیێ یێن حکومەتا ھەرێما کوردستانێ گرنگی دان بو ب پێکڤە ژیانا ھەمی پێکھاتان, زور کاودانێن نە خوش و نەخاستی ژی بەرسینگێ کوردستانێ گرت , بەلێ کورد ھەر ژ پرنسیپێن پێکڤە ژیانێ بێ جوداھی ل ئەرک و مافان ژێ ڤە نەبون.
ب درێژاھیا ھەشت کابینێن حکومەتا ھەرێما کوردستانێ تایبەت ئەو کابینێن کو نێچرڤان بارزانی سەروکاتی کری , بەردەوام کار ل سەر پاراستنا مافێ پێکھاتان ل بیاڤێ ئولی و سیاسی و پەروەردەی و روشنبیری و کلتوری کریە . ھەردەم پێکول کریە کو ل یاسایێن جودا جودا ئەڤ پێکھاتە بێنە بەرچاڤ وەرگرتن . ئەڤێ چەندێ ژی رەنگڤەدایە ل وان کاودانێن کو دنھا دا ئەڤ پێکھاتەیە تێدا ب خوشی و بێ ئاریشە و دیر ژ گەف و دەست درێژیێن تائیفی و مەزھەبی و شوڤینی و رەگەزپەرستی دەرباز دکەن .
ل داویی گوتارا خوە دا نێچیرڤان بارزانی بەحس ژ رولێ ھەمی پێکھاتان کر ل سەر ئێخستنا ریفراندومێ و سەرکەفتن بو ھەمی پێکھاتانە ژ کورد و تورکمان و عەرەب و ئەرمەن و سریان و کلدان و ئاشوری . ب بسلمان و کریستیان و ئێزدی ڤە . دەمێ گوتی (... سەرئێخستنا ریفراندمێ دێ بیتە خالا کومکرنا ھەمی ئالیێن سیاسی و ھەمی پێکھاتێن کوردستانی ل ناڤ ھەرێما کوردستانێ دا ...) . ھەروەسا راگەھاند ( ل ریفراندومێ دا سەرکەفتی و خوسار نینە! یان ھەمی سەرکەفتی یان ھەمی خوسارەتن, سەرکەفتن و سەرنەکەفتنا ریفراندومێ ب چو ئالیی و حزبێن سیاسی ڤە گرێدای نینە . سەرکەفتنا ریفراندومێ واتا ھەمی گەلێ کوردستانێ ب ھەمی پێکھاتێن خوە ڤە سەرکەفت). لێرە دا بدیتنا من سەروک وەزیران دوو خالێن گرنگ بەرچاڤ دکەت و گرنگیێ ددەتێ :
(١) گرنگە ھەمی ئالیی و پێکھاتێن سیاسی بێ جوداھیێن ئایدولوجی و سیاسی و ئولی و مەزھەبی و نەتەوەی و ناوچەیی و بەرژەوەندیا حزبی و کەسی بێتە لادان و ریفراندوم و سەربەخویی ببیتە ئارمانجا ھەمی ئالیان .
(٢) گرنگە ھەمی پێکھاتێن کوردستانێ بزانن ئەو خوە دیێ ڤێ ئاخێ نە و ئەوان ئەزمونێ حوکمرانیا کوردستانێ دیتیە کو ب چو ئاوایی رێز ژ جوداھیا گرتیە دناڤ پێکھاتان دا . لەوما گرنگە ھەمی پێکھات کار بکەن بو سەرکەفتنا ریفراندومێ .
ئەگەر ل سەروبەرێ گشتی یێ پێکھاتێن کوردستانی بنێرین دێ بینی ھەمی بیاڤەکێ دا رێز ژ تایبەتمەندیێن وان ھاتیە گرتن. د نھا دا ھەرێما کوردستانێ د روژھەلاتا ناڤین دا ئارامترین پارچەیە بو پێکڤە ژیانا ھەمی پێکھاتێن ئولی و مەزھەبی و نەتەوەی. بو بەردەوامی دان ب ڤێ تابلویێ جوان ژ پێکڤە ژیانێ گرنگە ھەمی پێکھات ھاریکار بن بو سەرئێخستنا پرسا گرێ دای ب چارەنڤیسێ خوە ڤە کو ئەو ژی ریفراندوما سەربەخویێ یە .
ل داویێ من دڤێت بێژم کو گرنگە پێکھاتێن کوردستانی چەند خالان ژ بەر چاڤ وەربگرن بو ھندێ گەمییا سەربەخویێ بگەھیتە کنارێن ئارام و ب خەونا سەدان سالی بگەھینە و جوانترین نمونە پێشکێش بکەین د روژھەلاتا ناڤین :
١-گرنگە ھەمی پێکھاتێن ئولی و نەتەوەیی ل کوردستانێ دا , کومبون و کونگرەکێ سەرتاسەری و مەزن بگێرن و تێدا (بەلگەنامەکێ ) بلاڤ بکەن و کار بکەن ل سەر ڤێ بەلگەنامێ ل عیراقێ و ھەمی جیھانێ بو پەیداکرنا پشتەڤانیێ بو ریفراندوما سەربەخویێ , حکومەتا ھەرێما کوردستانێ دشێت ل ڤێ پێنگاڤێ ھاریکار بیت ب ھەمی شێوازەکێ .
٢-بێ دوو دلی فەرە ھەمی پێکھاتێن کوردستانی کار بکەن ل سەر دەنگدەر و نوخبا سیاسی و روشنبیری و ئولی کو ریفراندومێ ب مولکێ خوە بزانن.
٣-ئەو کەشێ ئازادێ کو ژێر سێبەرا ئالایێ کوردستانێ دا ھاتیە بەرقرار کرن, ھەمی ئالیی خوە دی راگەھاندنێن تایبەتن . فەرە ل راگەھاندنێن خوە دا وەک ئەرکەک نیشتیمانی و پرسەک چارەنڤیس ساز کار ل سەر ریفراندومێ بکەن.
٤-ھەمی پێکھاتێن کوردستانی پەیوەندی ب دەرڤە دباشن و ھژمارەک زور ژ کەس و کار و ئەکادیمی و سیاسی و چاڤدێر و ھەتا گەلەک ژ وان پوست ژ دەرڤە ھەنە , لوبێ بکەن بو ریفراندوما سەربەخویێ .