ئەوەی سەرۆک بارزانی لە سەرکردە و سیاسیەکانی تری کوردستان جیا دەکاتەوە، گوتنی واقعی سیاسییە بە خەڵک و قۆناغبەندییە بۆ گەیشتن بە ئامانجە نەتەوەییەکان و راستگۆییە لە نێوان گوتار و کرداریدا، ئەگەر ئاوڕێکیش لە مێژووی بزووتنەوەى رزگاریخوازی کورد و واقعبینی و راستگۆیی سەرۆک بارزانی بدەینەوە، دەگەینە ئەو راستییەی کە لە هیچ سەردەمێکدا درووشمێکی بەرز نەکردۆتەوە کە لەگەڵ ئەو قۆناغە و بارودۆخی سیاسی نەگونجابێت، یان هەڵوێستەکانی وەڵامدەرەوەی ئامانجە نەتەوەییەکانی ئەو قۆناغە نەبووبێ کە بزووتنەوەى رزگاریخوازی کورد گوزەری پێدا کردووە.
بۆ گوتنی واقعی سیاسی بە خەڵک سەرۆک بارزانی زۆر جاران باجی گەورەی بە حزبەکەی خۆی داوە، ئەوەش کاتێک دەردەکەوێ کە لە هیچ سەردەمێکدا درووشمێکی هەڵنەگرتووە کە لەگەڵ واقعی سیاسی ئەو سەردەمە نەگونجابێ، ئەوەش وایکردووە خۆی و حزبەکەی بەردەوام بکەونە ژێر تانە و تەشەری ناڕەوای نەیارەکانی، بەڵام نە باجی حزبی و نە تانە و تەشەری نەیارەکانی وایان نەکردووە سەرۆک بارزانی دەستبەرداری گوتنی واقعی سیاسی ببێت، هەر ئەوەشە وایکردووە سەرۆک بارزانی کورد بکاتە جەمسەرێکی دیاری ناو هاوکێشە سیاسیەکانی ناوچەکە.
بۆ قۆناغبەندی ئامانجە نەتەوەییەکانیش دەکرێ بڵێین: سەردەمانێک کە هاتی دوژمنان و نەهاتی کورد بوو، رژێمی بەعس لە لوتکەی هێز و باڵادەستی سیاسی و سەربازی دابوو، کوردیش جگە لە هێزی بڕوا بە خۆبوون و بیروباوەڕی شۆڕشگێڕی و دۆستایەتی چیاکان دۆستێکی تری شک نەدەبردوو و هێزێک نەبوو پشتیوانی بکات، کۆمەڵگەی نێودەوڵەتی بە هەردوو زلهێزەکەوە پشتیوانی سەددام و رژێمەکەی بوون، کورد و شۆڕشەکەشی دەخرانە بازنەی پیلانە هەرێمی و نێودەوڵەتیەکان، لەم گەردوونە پان و بەرینەدا کەسێک هاواری ئەنفال و ناڵەی کیمیاباران کراوانی نەدەبیستین، ئا لەو قۆناغە هستیار و ترسناکەدا کە کورد تەنها بەرگری لە بوون و مانەوەی خۆی پێدەکرا، حزبگەلێک لە دەرەوەی واقع و لە باوەشی خەیاڵی سیاسیدا مافی چارەی خۆنووسینیان وەک دوا ئامانج کردبووە بنێشتە خۆشەی سەر زاریان و موزایەدەی سیاسیان پێوە دەکرد، بەوەشەوە نەدەوەستان و پەلاماری سەرۆک بارزانیان دەدا و بەوە تاوانباریان دەکرد کە داوای (ئۆتۆنۆمی) دەکات.
ئێستا رووداوەکان پێچەوانە بوونەوە، هاتی کوردە و نەهاتی دوژمنانیەتی، شەڕی نیوان شیعە و سوننە گەیشتۆتە ئاستی سەربڕین و سوتاندنی یەکتری و کێشەی نێوان لایەنە شیعەکانیش تادێ قووڵتر دەبێتەوە، کورد دەرگای نیودەوڵەتی بە روودا کراوەتەوە و هێزی پێشمەرگەش پشتیوانی نێودەوڵەتی بۆ دۆزی کورد کێش کردووە، لەژێر خوێندنەوەی ئەو راستیانە و شڵەژاوی بارودۆخی سیاسی ناوچەکە، سەرۆک بارزانی ئامانجی ئۆتۆنۆمی و فیدراڵی تووڕهەڵداوە و خواستی سەربەخۆیی کوردستان و دامەزراندنی دەوڵەتی کوردی کردۆتە دوا ئامانج، کەچی هەڵگرانی درووشمی مافی چارەی خۆنووسینی دوێنێ، لە درووشمەکەیان پەشیمان بوونەوە و بوونە هەڵگری پەیامی گەڕانەوە بۆ بەغدا و پارێزەری یەکپارچەیی خاکی عێراق، سەرۆک بارزانیش بە ناسیۆنالیزمی توندڕەو و شەڕانی و تێکدەری ئارمی عێراق و هەڵگری پەیامی سەربەخۆیی کوردستان تاوانبار دەکەن، پەشیمان بوونەوەى ئەو حزب و دەستە و گرووپانە لە درووشمی دوێنێ و بادانەوەی ئەمڕۆیان بەرەو بەغدا ئەو راستییەمان پێدەڵێ: کە ئەوەی دوێنێ دەیانگوت باوبژی سیاسی بووە و هاواری ئەمڕۆشیان رشتنی کۆنەقینە.
بۆ راستگۆییش لە نێوان گوتار و کرداری سەرۆک بارزانیدا بە زمانی بەڵگە دەدوێم، ساڵی ١٩٨٩ کورد لە خراپترین باردۆخی سیاسی و سەربازیدا بوو، هێشتا زامی قووڵی ئەنفال خوێنی لێدەچۆڕا، دووکەڵ و تەمومژی کیمیاباران لە ئاسمانی کوردستاندا مۆنجی دەدان، رژێمی بەعس لە جەنگی هەشت ساڵەی ئێران بە سەرکەوتووی هاتبووە دەر و سەدام حوسێن لە ئەوپەڕی غرووری سەرکەوتندا لەگەڵ نەیارەکانی دەدوا، سەرۆک بارزانی و مام جەلال بۆ گەیاندنی کارەساتی ئەنفال و کیمیاباران و مەغدووری کورد بە جیهانی دەرەوە گەشتێکیان ئەنجامدا، دوای گەڕانەوەیان دەنگۆی پشتیوانی نێودەوڵەتی و جێبەجێ کردنی رێککەوتننامەی ١١ی ئازاری ساڵی ١٩٧٠ بڵاوبۆوە، بڵاوبوونەوەی ئەو دەنگۆیە ئەو پرسیارەی لا درووست کردم: سەددام حوسێن لە ئەوپەڕی لاوازی و بۆ ئەوەی رێککەوتننامەی ١١ی ئازار جێبەجێ نەکات، سەروەری عرووبەی خستە ژێر پێی شای ئێران، خێرە ئێستا بەو غرووریەی ئەو رێککەوتننامەیە جێبەجێ دەکات؟!
دوای چەند رۆژێک لە بڵاوبوونەوەى ئەو دەنگۆیە لەگەڵ چەند هەڤاڵێک سەردانی جەنابی سەرۆک بارزانیمان کرد و لە وەڵامی رای وڵاتان لەسەر دۆزی کورد فەرمووی: رای وڵاتان رەنگدانەوەی واقعی ئێستای ناوخۆی عێراقە، ئەوان واتا وەڵاتان بە دوای بەرژەوەندی خۆیاندا دەگەڕێن، ئەمڕۆش بەرژەوەندیەکانیان لای سەددام حوسێنە، لەگەڵ مام جەلال لە چایخانەیەک دادەنیشتین، کەسێک دەهات بۆ لامان نەماندەزانی چ پۆستێکی هەیە، پارەی چایەکەشمان بۆ دەدا بەس یۆ ئەوەی پێنج دەقیقە گوێمان لێبگرێ و بۆی باسی مەغدووری کورد بکەین، چاوێکی پێدا گێڕاین و فەرمووی: کورد خوا و ئێوەی پێشمەرگەی ماوە، منیش بەڵێن دەدەم لە سەنگەردا لەگەڵتان بمرم و بەجێتان ناوهێڵێم، درێژەی بە وتەکانی داو گوتی: حەز دەکەم ئەوەش بزانن کە چیا چەندی بەرز بێ شوێنێک هەیە پێی دەگوترێ لوتکە, کاتێ مرۆڤەکان سەردەکەون، هەیە لە دامێنی چیاکە دەوەستێ، هەیە تا نیوە دەڕوا و هەیە زیاتر، هەشیانە دەگاتە لوتکەکە، بەڵام دوای ئەوە بۆ هەر لایەک بڕوات چارەنووسی شۆڕبوونەوەیە، سەددام حوسێنیش لە دڕندەیی و پیاوکوژی و وێرانکاریدا گەیشتۆتە لوتکەی دیکتاتۆری و زۆریتر نابات بەرەو شۆڕبوونەوە و لەناوچوون دەچێت، ئیتر زۆری نەبرد و وەک بینیمان کوێتی گرت و لە لوتکەوە هاتە خوارێ و رژێمەکەی دووچاری رووخان کرد و خۆشی لەناوچوو، بۆیە بڕوای تەواوم بە واقعبینی سیاسی و راستگۆیی لە نێوان گوتار و کرداری جەنابی سەرۆک بارزانیدا هەیە، لەوەش دڵنیام تا شوێن پێی قایم نەکات هەنگاو نانێ، بۆیە ئێستا کە داوای سەربەخۆیی کوردستان دەکات، لەو واقعبینی و راستگۆییەوە سەرچاوەی گرتووە و دەزانێ دەرفەتەکە لەبارە و گومانیش لەوەدا نییە کە سەرکەوتوو دەبێ و، کورد دەگەیەنێتە کەناری ئارام و خەونی سەربەخۆیی بەدیدێنێ.