لەسەردەمی دەسەڵاتی تورکە عوسمانیەکان کۆکردنەوەی باج و خەراج لەژێر قەڵەمڕەوی دەسەڵاتیان سەرچاوەکی گرنگی داهاتیان بوو، لەو کاتەدا شێخ عەبدولسەلامی بارزانی نیشتیمان پەروەری سەردەمی خۆی هەستی بە گرنگی ئابووری سەربەخۆ کرد و یەکێک لە داواکاری شۆڕشەکەی ئەوەبوو، کە ئەو باج و خەراجەی لە کوردستان کۆ دەکرێتەوە بۆ کوردستان و خەڵکی کوردستان خەرج بکرێتەوە، ئێستا (١١٠) ساڵ زیاتر بەسەر ئەو بەروارەدا تێدەپەرێ، کەچی سیاسیە بە رواڵەت پرۆفیشناڵ لە ناوەرۆکدا کەم ئەزموونەکانمان نەک هەر دەیانەوێ داهاتی کوردستان رادەستی بەغدای عەرەبی بکەنەوە، بە هەموو هیزی چەواشەکاری و سیاسەتی گەوجاننیانەوە کار لەسەر ئەوە دەکەن وەک رێز گرتنێک لە برا گەورەیی عەرەب و منەتباری پێکەوەژیان لەگەڵیان و پیرۆز راگرتنی ناوچەی سەوزی بەغدا، بڕیارە سیاسی و چارەنووسسازەکانیش هەر لە بەغدای عرووبەوە بەسەر کوردستان و کوردایەتیدا بسەپێنرێنەوە.
داواکارییەکی تری شۆڕشەکەی شێخ عەبدولسەلامی بارزانی لەو کاتەدا گرنگیدان بووە بە پرۆسەی پەروەردە لە کوردستان و خوێندن بووە بە زمانی کوردی، ئێستا (١١٠) زیاتر بەسەر ئەو بەروارەدا تیدەپەرێ، کەچی ئەبودوکتۆراکانی تاریکبیر بایکۆت دەکەنە دوا خواست و داواکاری مامۆستایان، پەرلەمانتاری کورد و جێگرە کوردەکەی سەرۆکە عەرەبیەکەی پەرلەمان دێتە ناو بایکۆتچییان و دەڵێ: بایکۆت و پەکخستنی سلکی پەروەردە مافێکی رەوای خۆتانە و ئێوە بەردەوام بن لە بایکۆت، ئێمەی نوێنەریشتان لە بەغدای رووگەی سیاسی و ئابووریمانەوە مووچەتان بۆ دێنینەوە.
لەگەڵ ئەو راستیانە و زۆر راستی تریش، ئەو وتار گەورە و کردار بچووکانە زمانی موزایەدەیان لە جووڵە ناکەوێ و لە لوتکەی خەیاڵی سیاسییەوە بۆ پێدەشتی واقع دەڕوانن و دەڵێن: دەبێ کوردستان هاوشێوەی ئەوروپا و ئەمەریکا بێت، خەیاڵی ئەو خەیاڵبازانە لە کاتیکدایە کە ئەوروپا و ئەمەریکا (١١٠) بەر لە ئێستا بەرەو شەڕ و ئاشووب و وێرانکاری هەنگاویان دەنا، کەچی ئێستا شەڕی ئەستێرەکان دەکەن و سنوور لە نێوانیان هەڵدەگرن، شێخ عەبدولسەلامی بارزانیش (١١٠) بەر لە ئێستا ماف و ئامانجە نەتەوەییەکانی کوردی لە دووتوێی شۆڕش و راپەڕینەکەیدا جێکردۆتەوە و بە دوای ئازادی و خۆشگوزەرانی و ئاوەدانی وڵاتەکەیدا وێڵ بووە، سیاسی و رۆشنبیرەکانی ئێستاشمان لە تاقیگەی عرووبەدا پشکنین بۆ شێرپەنجەی هزر و بیری نەتەوەیی دەکەن و دەڵێن: دەرمانی هەموو دەردان گەڕانەوەیە بۆ کۆنە هەواری ژێردەستەیی و چوونەوە بەغدا دەکەنە ئامانج و سەبەخۆیی بە ژێردەستەیی دەگۆڕنەوە.