شکەستنا تیرۆریستێن داعشێ لسەر دەستێ پێشمەرگەێ قەھرەمان و ب سەر پەرشتیا فەرماندێ گشتیێ پێشمەرگەی سەرۆک بارزانی کەرەمەک مەزن بی خۆدایێ مەزن دگەل مرۆڤایەتیێ کری. ھەکەر ئەڤ دەولەتا نەئیسلامی تیرۆریستی بسەرکەفتبایە خەلکێ وەکی چەوا ئەڤرۆ تەماشەی دیرۆکێ دکەن ئەو دیرۆک نەدخواند. خەلک یێ فێربووی گاڤا لایەن یان گروپ یان تاخمەک شکەست ھنگی دێ ناڤێن بەرۆڤاژی وەکی تیرۆریست یان دڕندە یان ھۆڤ یان...ھتد بۆ بێژن. ھەکەر ئەڤ دەولەتە سەرکەفتبایە خەلک دا بجۆرەک دیتر دیرۆکێ خوینیتن. ل شوینا تیرۆریستان دا ناڤێ وان بیتە مۆجاھدێن ڕێکا خۆدێ و ئیسلامێ. ل شوینا ھاتبایە خواندن کا وان دڕندێن ھوڤ چەند کوردێن ئێزدی و شەبەک و کاکەیی و مەسیحی و خەلکا دیتر، ب ژن و زارۆکڤە، ل دەڤەرێن داگیرکری گرتن و کۆشتن و سەربڕینە و کرێت کرن و دفرۆتن و دکرنە کۆیلە، دا خویین وان مۆجاھدان چەند دەڤەرێن کافرستانی (فەتح) و ( مۆسلمان) کرن، بەلێ ( مۆجاھدێن ) نەمۆجاھد! ھنگی دا ئەو ئەبوو بەکر بەغدادیێ ھندەک کۆن ب کۆن لدویڤ دگەڕھن بکۆژن دا بیتە خەلیفەکێ وەکی حەجاجێ یوسف یان سۆلتان سەلیم یان سۆلتان عەبدولحەمید یان سەلاحەدینەکێ ئەیووبی و ھزاران سەودەسەرێن بسەردا چۆیێ ل تەڤایا جیھانێ گەھنە ڕێزێن سوپایێ وی و ھندادیتر جیھانێ کاڤل کەن. ھنگی ئەڤ ڕێکخراوا تیرۆریستی دا بەژن و بالا خۆ یا پیس و کرێت ب کراس و فیستانەکێ جوان و پاقژێ ئیسلامێ ڤەشێریتن و ھزاران مرۆڤێن خەمسار و نڤستی بسەردابەتن و وان ژی کەتە پشکەک ژ وی سیتسەمێ دڕندانە و ناڤێ ئیسلامێ ھندێ دیتر ڕەش کەن. ھەرچەندە کە ناڤێ ئیسلاما پاقژ و جوان و یاکۆ بۆھایێن دادپەروەری و ئێکسانی و مرۆڤدۆستی و ڕێزگرتن و... ھتد، و ژ ژێدەر و تێکستێن وێ ھەواردکەن و ژھندێ مەزنترە کە وەکی دبێژن:دەریا ب دەڤێ سەگی پیس نابیتن! ئەڤێ جورێ خواندنا دیرۆکێ و لسەر بنەمایێ شێوازێ ھزرکرنا لۆژیکا کەڤن جیھان تێکدا و خرابکر، ھەتا مرۆڤایەتی فێرنەبیتن ئەڤ سیستەمێ ھزرکرنێ لنک خۆ بگۆھوریتن دێ حال ئەڤەبیتن و بەلکۆ ژی گەلەک خرابتر لێبھێتن. فەرە و پێدڤیە زانا بگشتی و فەیلەسۆف و زانایێن ئایینی نەخاسمە ڕابن و د کۆنگرەکا جیھانی دا سیستەمەکێ نویتر بۆ جۆرێ ھزرکرنا دڤی بابەتی و سەربۆرا دیرۆکێ و خواندنا وێ دەینن، دا ھێدی کەس نەوێریتن نە ب ئاشکرا و نە ب دزیکیڤە بۆ یێن وەکی ئەبوو بەکر بەغدادی چەپلا بقۆتینن و وی درەوکەرێ مەزن ب ئێک ژ پەیرەوێن ئیسلاما ڕاست بھژمێریتن و خۆزیکا سەرکەفتنێن وی بخوازیتن. ئەوێ ئەڤرۆکە ململانێ دگەل مامۆستایێ خۆ، ئەیمەن زەواھیری، دکەتن و ئەڤە وی و ئەو ڤی تاوانبار دکەتن و ھەر ئێک خۆ ب ئەمیر ددەینیتن بەلێ ئەوان یا ژبیرکری شەڤا ( ١٩) رەمەزانا سالا چلێ کۆچی، پشتی شەھیدبوونا خەلیفەیێ چھارەم (س) ئەمیراتی یا بسەر چۆی و ھەکەر ھەتا ھنگی بڕیار و دەستھەلات و ( فەتوا) دان لناڤ دەستێن چەند کەسێن ئەمین و باوەرپێکری و دادپەروەرێن وەکی پێغەمبەری (س ) و چھار خەلیفەیان ( سلاڤ ل ھەمیان بن ) بی، لێ پشتی ھنگی ئەڤ سەنترالیتە ( مەرکەزیەت ) د کاروبارێن ئایینی ژناڤچۆ و وەلێ ھات کەفتە د دەستێن ھزار ھزار کەسان. مامۆستایەکێ دەڤەرا زۆمار ڤەدگێڕیتن بەری ھاتنا داعشان گەنجەک لدەڤەرا مە فەلیتەکەک بی چەند دەینێ خەلکێ لنک بی و پارێ خەلکێ دخوار، و دەمێ داعش ھاتین کەفتە دویڤ وان و پشتی مدەھەکی، دەرکەفت، یێ بوویە ( مۆفتی ) و ( فەتوایان ) بۆ داعشان ددەتن!!! پا ڤێجا ئەڤا بەغدادی و یێن دیتر چ ڕامان ژێ دچیتن؟؟!!
*ئەڤ بابەتە ل ژمارا (٢٠٣١) ێ ڕۆژناما ئەڤرۆ ل ( ١١/١/٢٠١٧) ل لاپەڕێ(١٣) ژی ھاتیە بەلاڤکرن. *بسپۆرێ ئەکادیمی د زانستێن سایکۆلۆژی و پێداگۆگی/ زانینگەھا زاخۆ