ساڵی ١٩٨٥ دووەم جارم بوو کە بەدیداری کاک ئیدریس بارزانی شاد بووم, دوای ئەوەی ماوەیەک بۆی باسی کوردایەتی و شۆڕش و پیرۆزیەکانی ئەرکی پێشمەرگایەتی کردم, گوتم: کاک ئیدریس دەزانی کەی لەو شۆڕشەی ئێستا هەڵدەگەڕێمەوە؟! فەرموی جا کە لە ئێستاوە بڕیارت داوە رؤژێک دێ لە شۆڕش هەڵبگەڕێیەوە بۆچی چەکی پێشمەرگایەتیت کردۆتە شان؟ منیش گوتم: کاک ئیدریس کە کوردستان رزگار بوو ئەو جاش و خیانەتکارانەی دەستیان بە خوێنی پێشمەرگە سوورە و پشتیان لە کورد کردووە و بۆ بەرژەوەندی تایبەتی چوونە باوەشی رژێمەوە لێیان دەبوورن, منیش ئەوکات ناچار دەبم روو لە چیا بکەمەوە و بۆ جارێکی تر چەکی پێشمەرگایەتی بکەمەوە شان, سەیرێکی کردم و فەرمووی: سوورە مەرگەیی ئەگەر ئەوە روویدا من یەکەم کەس دەبم روو لە چیا دەکەمەوە و دەبێ تۆ دووبارە پەیوەندی بە منەوە بکەیەوە.
بەڵێ کوردستان رزگار بوو, بەڵام نەک لە جاش و خیانەتکارەکان بووردن, بەڵکو هێنرانە سەر سفرەی حازر و دەستیان بەسەر رەنجی پێشمەرگە و خوێنی شەهیدانیشدا گرت, بە داخەوە مەرگ نەیهێشت کاک ئیدریس رزگاری کوردستان و وەلانانی پێشمەرگە و هێنانە پێش و تەراتێنی ئەمڕۆی جاش و خیانەتکارەکان ببینێ و بەڵێنەکەی بەرێتە سەر و رابەرایەتی شۆڕشی لێک جیاکردنەوەی پاک و پیس بکات, بەو هۆیەوە منیش بەڵێن شکێنیم کرد و کاک ئیدریسم لە چیا نەبینی تا بتوانم بەڵێنەکەم بەرمە سەر.
لە ئێستادا کە دوا قۆناغی رزگاری نیشتیمانی و سەربەخۆیی کوردستان دەستی پێکردووە و دەرفەتەکەش بۆ بەدیهێنانی ئەو ئامانجە زۆر لەبارە, بەڵام هەندێ دەستە و گرووپ بە ناوی جیا جیا و موزایەدەی پەرۆشی خەڵک لە جاش و خیانەتکارەکانی ئەوکات خراپتر دەستیان لەگەڵ دوژمنان تێکەڵ کردووە, زۆر لەوانیش خراپتر بە گژ خواست و ئیرادەی سەربەخۆیی کوردستاندا دەچنەوە و دڵیان بۆ یەکپارچەیی خاکی عێراق و دووبارە ژێردەستە کردنەوەی کورد لێدەدات, جا ئەگەر کورد لەو قۆناغەش سەرکەوت و کوردستان بە سەربەخۆیی گەیشت, ترسم لەوەیە چۆن جاشەکان هاتنە سەر سفرەی حازر و دەستیان بەسەر رەنج و خوێنی پێشمەرگە و شەهیداندا گرت, ئەوانیش خۆیان بکەن بە قارەمانی بەدیهێنانی سەربەخۆیی کوردستان و بەدیهێنەرانی راستقینەی سەربەخۆیی بەلاوە بنێن, بێگومان هەر واش دەبێ, بەڵام ئەگەر ئەوە رووبدات و پارتی پێدەنگ بێ, بەڵێن بێ من یەکەم کەس دەبم خەنجەی کوردایەتی لە پارتی هەڵدەکێشم.