لە هەر وڵاتیك بوونی پارتی سیاسی و مومارەسەی ئازادانەی ئەو پارتانە بۆ جێبەجێ كردنی ئەجێندای سیاسی خۆیان، دوای ئەوەی لە هەڵبژاردنەكان دەنگی پێویست دێنن، كارێكی ئاساییەو بگرە هەنگاوێكی دیموكراسیانەشە بۆ ئەوەی ئەو پارتە بتوانێت بەرنامەو پڕۆگرامی كاتی بانگەشەی خۆی، دوای گرتنە دەستی دەسەڵات یان پشكدار بوونی لە دەسەڵات، یان ئەگەر وەك ئۆپۆزیسیۆنیش بێت، جێبەجێی بكات، بەڵام بێگومان دەبێت بەرنامەكانی لە خزمەت هاووڵاتی و نیشتماندا بێت و بەها باڵاكانی وڵاتی لەبەرچاو بێت و بۆ بەرژەوندییە گشتییەكان تێبكۆشێت، نەك ببێتە دڕكێك بۆ پێشڤە نەبردنی بەرژەوەندی گشتی وڵات و وڵات بباتە لێواری لەناوچوون و هۆكار بێت بۆ دروست كردنی ئیرهابی هزری.
بە داخەوە هەر لە ساڵی (2009) ەوە تا ئێستاش ئەو سیاسەت كردن و مومارەسە سیاسییەی لەلایەن هەندێك پارتی سیاسییەوە ئەنجام دەدرێت و ئەو فەوزایەی لە گۆڕەپانی سیاسی كوردستانەوە دەگوزەرێت، سیاسەتێكی ناتەندروست و ناسروشتییە كە بەناوی هەندێك پڕەنسیپی جیهانی وەك مافی مروڤ و ئازادیی رادەربڕین و دەستاودەست كردنی ئاشتیانەی دەسەڵات و ....هتد، خۆڵیان كردۆتە چاوی خەڵك و دەستیان داوەتە چەواشەكاری و ئیرهابێكی فیكریان دەست پێكردووە كە تەنیا هاووڵاتی رەشوڕووت زەرەرمەندی یەكەمە.
ئەو پارتە سیاسییانەی كە بە قسەی خۆیان، خۆیان كردۆتە دەم راستی خەڵكی هەژار و داماوی كوردستان و بوونەتە (رۆبین هۆد) بۆ رزگاركردنی خەڵك لە نەهامەتی، ئەوا خەریكن كە رابردوو و ئێستا و داهاتووی گەلی كورد و كوردستان بخەنە مەترسی و دوو دەستی تەسلیمی بەغدای بكەن.
كاتێك لە ئۆپۆزیسیۆن بوون، هەرچی رێگەی نەشیاوی ئۆپۆزیسیۆنی بوو كە لە هیچ قاموسێكی پارتە ئۆپۆزیسیۆنەكانی جیهانی نەبووەو نییە، تاقی كردەوە، كەسە ناپسپۆرەكانیان ببوونە پسپۆری دارایی و داتاو ژمارەی هەڵەیان دەرخواردی خەڵك دەدا، هەر یەكێك ببووە حاسیبەو وای لێهاتبوو كە مێشیان دەكردە گامێش.
هەموو ئەو چەنەبازییەشیان بۆ ئەوە بوو كە بێنە نێو دەسەڵات، ئاخیر ئەوانە، ئەو پارتە ئۆپۆزیسیۆنانە، لە دڵی كور، حەزیان دەكرد دەسەڵاتیان هەبێت، بەڵام هیندە درۆیان بۆ خەڵك كردبوو، نەیاندەزانی چۆن بێنە نێو دەسەڵات، هێندە هاتوهاواریان كرد، كە لە دوماهی هەر هاتنە نێو دەسەڵات. حزبی براوە كە پارتی دیموكراتی كوردستان بوو لەپێناو گەل و نیشتمان و داهاتووی وڵات بەشی خۆشی لە گەل ئەوان دیسان بەش كردەوەو هاتنەوە نێو دەسەڵات، بەڵام چ جۆرە هاتنێك؟ مانایان بۆ هیچ پڕەنسیپێكی سیاسی و ئەخلاقی نەهێشتەوە، پڕەنسیپی تەوافقی سیاسییان شكاند، كە ئەو عێراقەی ئەوان شانازی پێوە دەكەن لەسەر بنیات نرابوویەوەو بە هۆیەوە ببوویەوە وڵاتێكی سەرپێ و تا رادەیەك ئارام، ئاخیر ئەوان زۆرجار دەڵێن، ئێمە دەبێت لە عێراق و حكومەتەكەی و سەركردەكانی فێرە ئەزموون بین و دیموكراسیەتی بەغدا بگوازینەوە كوردستان، ئەو بەغدایەی كە مووچەی خەڵكی كوردستانی بڕی و هێزی دیجلەی هێنا سەر كوردستان و شەڕی داسەپاوی داعشی بەسەر كوردستان سەپاندو تا ئێستاشی لەگەڵدا بێت نەیتوانیوە كەمترین خزمەتگوزاری شایستە، پێشكەشی هاووڵاتیانی بكات، گەر خۆیان لە خوا نەكەن، هەموویان سەردانی پارێزگاكانی ناوەڕاست و باشووریان كردووە و دەزانن خەڵكی ئەم شوێنانە بە بەغداشەوە لە چ نەهامەتییەك دەژین.
ئەوان گوتیان، نە، ئێمە كەمینە و تەوافوق ناهێڵین و دەبینە پاڵەوانی بێ ركابەری گۆڕەپانی سیاسی كوردستان و وڵات بەرەو ئایندەی رۆشن دەبەین و پارتی دیموكراتی كوردستان بە چۆك دادێنین و ئەجێندای ناكوردستانی لە كوردستان جێبەجێ دەكەین و دڵی ئەوانە خۆش دەكەین كە بە شكانی پارتی دیموكراتی كورستان دڵخۆش دەبن، ئاخیر پارتی دیموكراتی كوردستان و بارزانی دروشمی دەوڵەت بوونی هەڵگرتووە، كونسوڵی ئێران داوەتی كۆدەتاكەی پەرلەمان دەكەین، بۆ ئەوەی پێی بڵێین، ئەوە خەریكین ئەجێندا راستەقینەكانمان جێبەجێ دەكەین.
مخابن، نەك وڵاتیان بەرەوە ئایندەی رۆشن نەبرد، بەڵكو بوونە هۆكاری پەكخستنی پەرلەمان و هۆكاری ئاژاوەو نانەوەی دووبەرەكی. من لێرە بە وردتر دەمەوێ رووی دەمم ئاڕاستەی (گۆڕان) بكەم، كە ویستی بیگۆڕێت، نەك نەیتوانی بیگۆڕیت، بەڵكو خۆشی هەمدیسان گۆڕا بەرەو ئاراستەیەكی ناسروشتی، كە گومانی لای هەمووان دروست كردووە كە بە راستی ئەوان بۆ كێ وا دەكەن؟ بۆچی وا دەكەن؟ ئەمانە كوردایەتی دەكەن؟ ئەمانە بۆ كوردستان و نەتەوەی كورد و داهاتووی سەربەخۆی كوردستان وا دەكەن؟.
ئەوان لە كوردستان و بەغدا خەریكی چین؟ پارێزگای سلێمانی، پایتەختی رۆشنبیرییان كردۆتە پایتەختی ئیرهابی فیكری و یاری بە داهاتووی نەوەیەك دەكەن كە ئەم جیلە جیلی بنیاتنەری دەوڵەتی كوردستانن، خەڵكی سلێمانی زۆر لەوە مەزنترە كە كۆمەڵە كەسێكی نابەرپرسی بێ عەقل، یاری بە داهاتوو و رابردوو و ئێستای ئەوانەوە بكەن، خەڵكی رۆشنبیر و خۆڕاگری سلێمانی چۆكی بە هەموو دۆژمنان داداوە، بۆیە دەبێت زۆر چاوكراوەتر بن لەوەی هەندێك كەس و لایەن بیانەوێت بۆ بەرژەوندی حیزبی و لە پێناو دوو كورسیی زیاتری پەرلەمانی یاری بە داهاتووی ئەوان و منداڵەكانیان بكەن.
ئەوان لە بەغدا خەریكی ئەوەن لەگەڵ عەرەبە هاوبیرەكانیان لە بەهاو پێگەی هەرێم و حكومەتەكەی كەم بكەنەوە، ئەو بەغدایەی چاكەت و پێڵاوەكانیان لێ بە جێماو و تا ئێستاش نازانرێت چاكەت و پێڵاوەكانیان چی بەسەر هات! ئەوان خەریكی ئەوەن هەرچی حەنان فەتلاوی لە پەرلەمانی عێراق دژی هەرێم و حكومەتی كوردستان بڵێت، بە نیشانەی راستی و دروستی ئاخافتنەكانی، سەری بۆ بهەژێنن و پێی بڵێن دەستخۆش و دواتر دوو ماچیشی لێ بكەن. ئەوان خەریكن لەگەل نانبڕەكەی كوردستان(نوری مالیكی) لە دژی هەرێم و كەركوك و بەتایبەتیش پارتی دیموكراتی كورستان پرۆژەی مەترسیدار بۆ داهاتووی كوردستان و عێراق جێبەجێ بكەن، ئەمانە تۆمەت نین، ئەمانە ئەو دەرهاوێشتانەن كە ئێمە لە هەڵسوكەوت و سیاسەت كردنی ئەوان لە كورستان و بەغدا دەیبینین.
ئەوان خەریكن هەموو شتێك تاقی دەكەنەوە تەنیا بۆ ئەوەی كوردستان و داهاتووی كوردستان خەوشدار كەن، ئەو شەڕەی ئەوان ئێستا دەیكەن، رەنگە شەڕی دوای پۆست دەوڵەت بوون بێت، ئەگەر بە راستی خەمیان خەمی بنیات نانی دەوڵەتێكی دیموكرات و ئازادە. بەڵام ئەوان دەستیان بۆ هەموو شتێكی مەترسیدار بردووە، بەهاو پیرۆزییەكانی نیشتمان، لای ئەوان رۆژانە بێ رێزی بەرامبەری دەكرێت، دەست بردن بۆ پیرۆزییەكان مایەی نیگەرانی و مەترسییە، كابرا عاقڵەكە، ئەوەی گوتبووی خۆ قاز نین (سەرۆكی پێشووی پەرلەمان) زۆر بێ شەرمانە، پێشمەرگە بە میلیشیا وەسف دەكات، ئەو پێشمەرگە قارەمانانەی كە گیانیان بۆتە قەلغان بۆ پاراستنی (یوسف) و نموونەكانی هاوبیری یوسف. رۆژێكی دیكە (عەدنان) ناوێكی گۆڕانخواز دێت و بێ رێزی بەرامبەر بە پێشمەرگە دەكات.
ئا لەم دوو سێ رۆژەی رابردووش (سروە عبدالواحید) پەرلەمانتارە گۆڕانخوازەكەی ئەنجومەنی نوێنەرانی عێراق، لە كەناڵی راگەیاندنی (دجلة) و لە بەرنامەی (بصراحة) زۆر بێ شەرمانە و دوور لە هەموو بەهایەكی ئەخلاقی و لەجیاتی ئەوەی بەرگری لە كورد و كوردستان و پێشمەرگە و كەركوك بكات و بەرگری لە داوێن پاكژيی ئافرەتی كوردی و دایك و هاوسەر و كچ و خوشكی شەهید بكات، بە وشە و رستەی نەشیاو باس لە فرۆشتنی جەستەی كەسوكاری شەهید دەكات، دەبێت ئەمە چ جۆرە بیركردنەوە و چ جۆرە خزمەتێك بێت كە ئەم مرۆڤە بیەوێت بەم جۆرە قسانەی هاریكاری كەسوكاری شەهیدان و گەلی كورستان بكات و دواتریش بێ شەرمنانە بڵێت من وام نەگوتووەو ئامادە نەبێت داوای لێبووردنیش بكات، خۆ عوزر لە قەباحەت مەزنتر بێت، كارەساتە! ئەم خاتوونە كوردە گۆڕانخوازە دەبێت بیری چووبێتەوە كە ئەگەر قارەمانیەتی پێشمەرگەو خوێنی پاكی شەهیدان و جەرگ سووتاوی و خۆڕاگری خیزان و كەسوكاری شەهیدان نەبوایە، ئێستا ئەو بەڕێزە و ئەوانەی وەك ئەو بیر دەكەنەوە وەك جارییە لە باوەشی داعەشەكان نوستبوون. بە داخەوە بۆ ئەوانەی وەك ئەم خاتوونە بیر دەكەنەوە، مخابن سیاسەت كردنی ئەوان تەنیا بۆتە دروست كردنی ئیرهابی فیكری و ئاژاوە نانەوە و فەوزا و بێ رێزی كردن بە پیرۆزییەكان و بەها باڵاكانی وڵات، ئەم جۆرە سیاسەتە سیاسەتێكی فاشیلە و هاووڵاتی كوردستانی و ئەوانەی بە راستی دڵیان بەو كوردستانەو و خوێنی شەهیدانەوە هەیە نابێت بە دوای ئەوان بكەون و كوردستان و داهاتووی وڵات بخەنە مەترسییەوە و پێشكەشی دۆژمنانی بكەن.

* پەرلەمانتارو بڕیاردەری فراكسیۆنی پارتی دیموكراتی كوردستان لە ئەنجومەنی نوێنەرانی عێراق