کۆمسیۆنی باڵای هەڵبژاردنەکانی عێراق رای گەیاند، سبەی دوایین وادەی نوێکردنەوەی تۆماری دەنگدەرانە و رۆژی شەمەی داهاتووش دوایین وادەیە بۆ وەرگرتنی لیستی پاڵێوراوان.

جەمانە غەلاوی، وتەبێژ بەناوی کۆمسیۆنی باڵای هەڵبژاردنەکانی عێراق بۆ راگەیاندنەکان ئاشکرای کردووە، کۆمسیۆنی باڵا بەردەوامە لەسەر نوێکردنەوەی تۆماری دەنگدەران، بە مەبەستی تەواوکردنی و ئەنجامدانی هەڵبژاردن لە وادەی خۆیدا، کە وا بڕیارە لە 10ی تشرینی یەکەمی داهاتوودا ئەنجام بدرێ.

گوتیشی: ”رۆژی پێنج شەمە (15ی 4ی 2021) دوایین وادەیە بۆ نوێکردنەوەی تۆماری دەنگدەران، بەپێی ئەو خشتەیەی کۆمسیۆن بۆ تەواوکردنی کارەکانی دایناوە“.

ئاماژەی بەوەش دا: ”رۆژی شەمەی هەفتەی داهاتوو (17ی4ی 2021)، دوایین وادەیە بۆ وەرگرتنی لیستی پاڵێوراوان بۆ هەڵبژاردن“.

غەلاوی راشی گەیاند: ”دوای داخستنی تۆمارەکان، کۆمسیۆنی باڵا ژمارەی پاڵێوراوان رادەگەیەنێ، لەگەڵ ژمارەی ئەوانەی تۆماری هەڵبژاردنیان نوێ کردووەتەوە و ئەو هاوپەیمانییانەش، کە پێک هێنراون و ئەوانی دیکەیش، کە بەشداریی هەڵبژاردنەکە دەکەن“.

حکوومەتی عێراق رۆژی 10ی تشرینی یەکەمی داهاتووی بۆ هەڵبژاردنی پێشوەختەی عێراق دەستنیشان کردووە.












باسنيوز