ئەندامێكی لیژنەی دارایی پەرلەمانی عێراق ئاشكرایدەكات کە نۆ ملیار دۆلاری داھاتی ساڵانەی دەروازە سنوورییەكانی عێراق بەهەدەر دەڕوات.

مازن عەبدولمونعیم فەیلی، ئەندامی لیژنەی دارایی و وەبەرهێنان لە پەرلەمانی عێراق ڕایگەیاند: "بە پێی ئامارەكان داھاتی ساڵانەی دەروازە سنوورییەكانی عێراق دەگاتە سەرووی 10 ملیار دۆلار، بەڵام تەنھا ملیارێك دۆلار دەچێتەوە گەنجینەی دەوڵەت و نۆ ملیارەكەی تر چارەنووسی نادیارە و بەهەدەر دەڕوات".

مازن فەیلی، لە لێدوانێكی رۆژنامەوانیدا لە لاپەرەی تایبەتی خۆی لە تۆڕی كۆمەڵایەتیی (فەیسبووک) ئەوەشی خستەروو، "دەبێت حكوومەتی ھەرچی زووە چاكسازی لە گومرگ و دەروازە سنوورییەكان دەستپێبكات، دەبێت چارەسەرێك بدۆزرێتەوە و سامانی بەھەدەر دراو بگەڕێنرێتەوە بۆ حكوومەت و لە بەرامبەر لە كەرتی پیشەسازی و كشتوكاڵ و بەرزكردنەوەی ئاستی بەرھەمی ناوخۆیی تەرخان بكرێ".

فەیلی داواش دەكات بۆ شەفاكردنی داھات لەو دەروازە سنووریانە، سیستمی كاركردن بكرێنە ئەلكترۆنی و ئیدارەیەكی تۆكمە بۆ بەڕێوەبەردنیان دابمەزرێت و چیتر لێبوردنی گومرگی نەدرێتە گەورە بەرپرسانی عێراق و كۆمپانیاكانیان و بازرگانان.












باسنيوز