سوپای عێراق بە فەرمانی سەرۆک وەزیران ئۆپەراسیۆنێکی سەربازی لە باکووری بەغدای پایتەختی وڵاتەکە، دەکات.

شانەی راگەیاندنی ئەمنی لە بەیاننامەیەکدا رایگەیاندووە، ئۆپەراسیۆنەکە بەرەبەیانیی ئەمڕۆ پێنجشەممە 2-7-2020 لە ناوچەکانی باکووری بەغدا، دەستی پێکردووە.

ئۆپەراسیۆنەکە بە فەرمانی مستەفا کازمیی سەرۆک وەزیران و فەرماندەی گشتیی هێزە چەکدارەکانی عێراق ساز دەکرێت و تێیدا پاشماوەی چەکدارانی رێکخراوی تیرۆریستی داعش و شانە نووستووەکانی ئەو رێکخراوە تیرۆریستییە، دەکرێنە ئامانج.

ئەو ئۆپەراسیۆنەی سوپای عێراق لەکاتێک دایە، کە لە مانگی 12ـی 2017، حەیدەر عەبادی، سەرۆک وەزیرانی ئەوکاتی عێراق رایگەیاند، هەموو خاكی عێراق لە داعش پاک کرایەوە و ئەو رێکخراوە تیرۆریستییە لە وڵاتەکە کۆتایی پێهات.








باسنيوز