حکوومەتی عێراق تیمێکی پزیشکی بۆ ئاگاداربوون لە دەرەنجامی دەرمانی دژەکۆرۆنا، دەنێرێتە رووسیا.

ئەمڕۆ سێشەممە 23-6-2020، رۆژنامەی (سەباح)ی فەرمیی عێراق لەسەر زاری دکتۆر زیاد حازم، پسپۆڕی تەندروستیی گشتی لە فەرمانگەی تەندروستیی کەرخ لە بەغدا، بڵاوی کردووەتەوە، دەرمانی ئەڤیفاڤیر دەرمانێکی یابانییە، بەڵام رووسیا پەرەی پێداوە.

زیاد حازم هەروەها رایگەیاندووە، کە رووسیا لە 14-5-2020ـەوە دەرمانی ئەڤیفاڤیر بۆ تووشبووانی پەتای کۆرۆنا بەکار دەهێنێت و دەرکەوتووە ئەو دەرمانە کاریگەریی ئەرێنی لەسەر چاکبوونەوەی 20 هەزار تووشبوو، هەبووە.

ئەو بەرپرسە تەندروستییەی بەغدا ئاماژەی بە سەردانی تیمێکی پزیشکیی عێراقی بۆ رووسیا کردووە، کە تیمەکە لەوێ لە دەرەنجامی تاقیکردنەوەکانی دەرمانی ئەڤیفاڤیر ئاگادار دەکرێتەوە و گرێبەستی هاوردەکردنی دەرمانەکە لەگەڵ کۆمپانیای بەرهەمهێنەر، واژۆ دەکات و لە کۆتایی ئەم هەفتەیەدا، دەرمانەکە لە نەخۆشخانە حکوومییەکانی عێراق بەردەست دەبێت.

زیاد حازم هەروەها رایگەیاندووە، کە وڵاتەکەی ماددەی خاوی دەرمانی ئەڤیفاڤیر لە رووسیاوە هاوردە دەکات و لە کارگە پزیشکییەکانی خۆی دەیخاتە ناو کەپسول و دەینێرێتە نەخۆشخانەکان.





باسنيوز