وەزارەتی دەرەوەی عێراق دژی بۆردومانەکانی فڕۆکە جەنگییەکانی تورکیا، باڵوێزی ئەو وڵاتە لە بەغدا، بانگهێشت دەکات.

ئەمڕۆ سێشەممە 16-6-2020، وەزارەتی دەرەوەی عێراق لە بەیاننامەیەکدا، رایگەیاندووە، فاتح یڵدزی باڵوێزی تورکیا بانگهێشتی وەزارەتی دەرەوی کراوە.

هەروەک لە بەیاننامەکەدا، هاتووە، وەزارەتی دەرەوەی عێراق یاداشتێکی ناڕەزایی حکوومەتەکەی بەهۆی بۆردومانەکانی سوپا و فڕۆکە جەنگییەکانی تورکیا، داوەتە باڵوێزی ئەو وڵاتە لە بەغدا.

لە یاداشتەکەدا، وەزارەتی دەرەوەی عێراق ئاماژەی بەوە کردووە، کە بۆردومانەکان بوونەتە هۆی دروستکردنی ترس لای هاووڵاتییان و بەهۆیەوە تورکیا سەروەریی خاک و ئاسمانی عێراقی پێشێل کردووە و یاسا و بنەما نێودەوڵەتییەکانی ژێرپێ خستووە.

لە درەنگانی شەوی یەکشەممە و بەرەبەیانی رۆژی دووشەممە 15-6-2020دا، فڕۆکە جەنگییەکانی سوپای تورکیا بنکە و بارەگاکانی پەکەکەیان لە قەندیل، مەخموور و شنگال بۆردومان کرد.










باسنيوز