سەرۆکی هاوپەیمانی دەوڵەتی یاسا رایگەیاند، هەرچەندە ژمارەیەک داواکارییان لەلایەن چەند لایەنێک پێگەیشتوە بۆ لەسەرکارلابردنی حکومەتەکەی کازمی، بەڵام ئەوان پشتیوانی حکومەتی نوێ دەکەن ئەگەر لەکارەکانی بە ئاڕاستەیەکی ئەرێنی هەنگاو بنێت.

نوری مالیکی، سەرۆکی هاوپەیمانی دەوڵەتی یاسا بە کەناڵی فەرمی عێراقییەی راگەیاندوە، هەرچەندە دەوڵەتی یاسا بەشداری لە حکومەتی نوێ نەکردوە و دەنگیشی پێنەداوە، بەڵام دوای دەستبەکاربونی لە راگەیەنراوێکدا پشتیوانی خۆی بۆ حکومەت دەربڕی، هەڵوێستی ئەوان لەسەر پرسە گرنگ و چارەنوسازەکان کە پەیوەندییان بە سەروەری عێراقەوە هەیە بەو شێوازە بەردەوام دەبێت.

ئاماژەی بەوەشکردوە، داوایان لە لایەنەکان و خۆپیشاندەران کردوە دەرفەت بە حکومەتەکەی مستەفا کازمی بدرێت، بۆ ئەوەی بۆ ماوەیەک کاروباری وڵات رێکبخاتەوە و روانگەی خۆی بۆ چارەسەرکردنی کێشە دارایی، تەندروستی و ئەمنییەکان جێبەجێ بکات، ئەوان بۆ دەربڕینی ناڕەزاییەکان لەگڵ بونی ئۆپۆزسیۆنی مەدەنیدان و ناخوازن جارێکی دیکە جەنگ و خوێنڕشتن بگەڕێتەوە.

سەرۆکی هاوپەیمانی دەوڵەتی یاسا لەبارەی پرسی دەستکاریکردنی موچەش وتی، "ئەگەر حکومەت دەخوازێت دەستکاری موچە بکات، باشتروایە لە پلە باڵاکانەوە دەستپێبکات و نابێت بڕینی موچەی کەسوکاری شەهیدا، زیندانیانی سیاسی و هەژاران بگرێتەوە، هەروەها کازمی رونیکردوەتەوە بڕینی موچە ئەو کەسانە دەگرێتەوە کە موچەکانیان زیاترە لە ملیۆنێک و 500 هەزار دینار".






خەندان