پەرلەمانتارێکی هاوپەیمانیی فەتح (هاوپەیمانیی میلیشیا شیعەکان لە پەرلەمانی عێراق) پێشبینی دەکا کۆبوونەوەی پەرلەمان بۆ دەنگدان لەسەر کابینەی نوێ، دوا دەخرێ.

ئەمڕۆ چوارشەممە 6-5-2020، محەمەد بەلداوی، پەرلەمانتاری هاوپەیمانیی فەتح لە لێدوانێکی رۆژنامەوانیدا رایگەیاندووە، تا ئێستا کوتلە و لایەنە سیاسییەکان لەسەر دەنگدان بە کابینەی نوێی حکوومەتی عێراق بە سەرۆکایەتیی مستەفا کازمی، رێک نەکەوتوون.

محەمەد بەلداوی هەروەها رایگەیاندووە، لایەنە سیاسییەکان لەسەر چەند کاندیدێکی وەزارەتەکانی کابینەکەی مستەفا کازمی ناکۆکن و تا ئێستا نەگەیشتوونەتە رێککەوتنی کۆتایی.

ئەو پەرلەمانتارەی فەتح پێی وایە پەرلەمانی عێراق لە کۆبوونەوەی ئەمڕۆیدا ناتوانێ دەنگ لەسەر کابینەی نوێی حکوومەتی عێراق بدا و کۆبوونەوەکە بۆ رۆژی پێنجشەممە 7-5-2020 (سبەی)، دوا دەخرێت.

بڕیارە کاتژمێر 9ـی شەوی چوارشەممە 6-5-2020 (ئەمڕۆ)، پەرلەمانی عێراق بۆ دەنگدان لەسەر کابینەی نوێی حکوومەتی عێراق، کۆ ببێتەوە.

رۆژی پێنجشەممە 9-4-2020، بەرهەم ساڵحی سەرکۆماری عێراق، مستەفا کازمی، سەرۆکی دەزگای هەواڵگریی وڵاتەکەی بۆ پێکهێنانی کابینەی نوێی حکوومەتی عێراق راسپارد و بەپێی دەستوور، دەبێ تا رۆژی 9-5-2020 کابینەکەی پێک بهێنێت.





باسنیوز