ئەمڕۆ دووشەممە قایمقامی قەزای روتبەی سەر بە پارێزگای ئەنبار دروستكردنی دیوارێكی لمینی بە درێژایی 16 كیلۆمەتر بۆ ڕێگرتن لە دزەكردنی چەكدارانی ڕێكخراوی تیرۆریستیی داعش راگەیاند.

عیماد دلێمی قایمقامی روتبە بە میدیاكانی وڵاتەكەی راگەیاند دیوارێكی لمین بە درێژایی 16 كیلۆمەتر لە ناحیەی ئەلوەليدی رۆژئاوای ئەنبارەوە رادەكێشن.

گوتیشی فەرماندە سەربازییەكان دەستیان بە جێبەجێكردنی پرۆژەكە كردووە، ئەمەش بە ئامانجی بەهێزكردنی خۆپاراستن لە دزەكردنی چەكدارانی داعش بۆ سنوورەكە.

بە گوتەی قایمقامەكە، دیوارەكە 16 كیلۆمەتر درێژ دەبێت، بەرزییەكەی دەگاتە دوو مەتر و پانییەكەشی سێ مەتر، لەم نێوانەشدا خاڵی چاودێری ئاسایشی دادەندرێن.

ئەم هەنگاوە نوێیە لە كاتێكدایە چەكدارانی داعش لە سنوورەكانی كەركووك، سەڵاحەدین، دیالە و ئەنباردا دەستیان بە هێرشی تیرۆریستی كردووەتەوە.











باسنيوز