بەرپرسێ‌ لێژنا پارتی دیموكراتی كوردستان ل پارێزگەها مووسل دیار كر كودووڤ زانیارێن بۆ مە هاتین خەلكێ‌ گوندێن سەر مووسل ڤە گەفێن چۆلكرنا گوندێن خوە ژبەر تیرۆرستێن داعش دكەن چونكو رەوشا وان نەباشە بتایبەتی ژی دەڤەرا گەیارە و شورە و دەڤەرێن دی‌ یێن سەر مووسل ڤە.

عەلی ملحم، بەرپرسێ‌ لێژنا پارتی دیموكراتی كوردستان ل پارێزگەها مووسل دیار كر كو: "خەلك گەلەك ژ خوە دترسن و دبێژن دێ‌ جارەكا دی‌ تیرۆرستێن داعش وەكو سالا 2014ێ‌ ڤەگەرن و خەلك بچاڤێن خوە لڤینێن داعش دبینن. ژ بەر رۆژەكێ‌ تیرۆرستێن داعش هیرشی گوندێ‌ زلحەفە سەر ناحیا شورە ڤە نێزیك گەیارە سەر پارێزگەها موسل ڤە كرن دئەنجامدا موختارێ‌ گوندی برینداركرینە وپاشی شەر ناڤبەرا تیرۆرستێن داعش و خەلكێ‌ گوندی دا دروست بیت دئەنجامدا دوو تیرۆرستێن داعش دهێنە كوشتن و دوو تیرۆرستێن داعش ژی بریندار دبن، نها ژی رەوشا وان گوندان گەلەك تێك چوویە".

خۆیا ژی كر كو: "نۆكە ل پارێزگەها مووسل بتایبەتی ناحیە و گوندێن سەر مووسل ڤە گەلەك مەترسی‌ دروستبوویە، ئەڤە بوویە ئەگەر خەلك هزرا رەڤینێ ژ گوندێن خوە بكەن وبهێنە ناڤ مووسلێ‌ دا چونكو تیرۆرستێن داعش هێرشی سەر گوندان دكەن".











باسنیوز