ەمڕۆ سێشەممە حەسەن كەعبی جێگری سەرۆكی پەرلەمانی عێراق داوای كرد هاوئاهەنگی لەگەڵ حكوومەتی هەرێمی كوردستان بكرێت بۆ ئەوەی پێشمەرگە بەشداری بكات لە ڕووبەڕووبوونەوەی مەترسییەكانی ڕێكخراوی تیرۆریستیی داعش لە كەركووك و ناوچەكە.

ئەمڕۆ كەعبی رایگەیاند كە داعش هەڕەشە لە ئاسایشی چەند پارێزگایەك دەكات، پێویستە هاوئاهەنگی ئاسایشی لە نێوان بەغدا و هەرێمی كوردستان بكرێت بۆ ئەوەی سنوورەكان پارێزراو بن و ڕێگە لە دزەكردنی چەكدارانی داعش بگیرێت.

جێی باسە ئەم داوایە لە كاتێكدایە كە لە دوای ١٦ی ئۆكتۆبەری ٢٠١٧، كە حەشدی شەعبی دەستی بەسەر شاری كەركووك و ناوچە كوردستانییەكانی تری سنوورەكە داگرت، دۆخی ئاسایشی ئەم سنوورە بەردەوام بەرەو خراپی دەچێت و ماوەیەكیشە داعش بە ئاشكرا هەڕەشە لە ئاسایشی سنوورەكە دەكات و دەستی بە هێرشی تیرۆریستی كردووەتەوە.

ئەمڕۆش كەعبی لە میانی سەرۆكایەتیكردنی كۆبوونەوەیەكی فرەواندا بە ئامادەبوونی سەرۆكی لیژنەی ئاسایش و بەرگریی پەرلەمانی عێراق و جێگری فەرماندەی ئۆپەراسیۆنەكانی عێراق، فەرماندەكانی ئۆپەراسیۆنەكانی كەركووك، دیالە و سەڵاحەدین، هۆشداری دا لەوەی هەڕەشەی داعش توندتر دەبێت لە ناوچەكە و پێویستە ئاگەداری ئاسایشی ئەم پارێزگایانە بن.

جێگری سەرۆكی پەرلەمانی عێراق داواشی كرد ناوەندەكانی هاوئاهەنگی ئاسایشی نێوان حكوومەتی فیدراڵی و حكوومەتی هەرێمی كوردستان كارا بكرێنەوە و هێزە ئاسایشییە جیاوازەكان و هێزەكانی پێشمەرگە یارمەتیدەر بن لە پاراستنی ئاسایشی ناوچەكە و ڕێگرتن لە دزەكردنی زیاتری چەكدارانی داعش.










باسنيوز