وەزیری گواستنەوەی عێراق لە بەیاننامەیەکدا رایگەیاند، 586 هاووڵاتیی عێراقی بە سێ گەشتی ئاسمانیی هێڵی ئاسمانیی عێراقییە لە فڕۆکەخانەی نێودەوڵەتیی بەغداوە لە دەرەوەی وڵات گەڕێندراونەتەوە.

ئەمڕۆ سێشەممە 21-4-2020 ، عەبدوڵڵا لعێبی، وەزیری گواستنەوەی عێراق لە بەیاننامەیەکدا رایگەیاند، ئەو کەسانە لە رێگەی سێ گەشتی تایبەتی هێڵی ئاسمانیی عێراقی گەڕێندراونەتەوە، کە دوو گەشتیان لە عومان و گەشتەکەی دیکە لە قاهیرەوە بووە، ئەمەش دوای ئەوەی رەزامەندی وەرگیراوە و گەڕانەوەشیان لەسەر بنەمای بڕیار و راسپاردەی لیژنەی باڵای تەندروستی و سەلامەتیی نیشتمانی بەرەنگاربوونەوەی ڤایرۆسی کۆرۆنایە.

وەزیری گواستنەوەی عێراق گوتیشی، گەڕانەوەی هاووڵاتییانی دەرەوە بە هاوئاهەنگی لەگەڵ وەزارەتی دەرەوە و تەندروستی و ناوخۆیە، سەرجەم گەڕاوەکانیش لە فڕۆکەخانەی نێودەوڵەتی پشکنینیان بۆ دەکرێت.

بەپێی دوایین ئامارەکانی وەزارەتی تەندروستیی عێراق لەبارەی ژمارەی تووشبووان و گیانلەدەستدان بە کۆرۆنا، هەزار و 602 کەس تووشی ڤایرۆسەکە بوون، هەزار و 96 کەسیان چاکبوونەتەوە و 83 تووشبوو گیانیان لەدەستداوە.









رووداو