ئەمڕۆ سێشەممە ژنێك لە بەغدا دەزگا پەیوەندیدارەكانی ئاگادار كردەوە كە مێردەكەی تووشی پەتای ڤایرۆسی كۆرۆنا بووە، بەڵام كاتێك لێیان كۆڵیوەتەوە، دەركەوتووە ژنەكە بە درۆ ویستوویەتی مێردەكەی لەكۆڵ خۆی بكاتەوە و رەوانەی نەخۆشخانەی تایبەت و كەرەنتینی حكومی بكرێت.

میدیاكانی عێراق رایانگەیاند كە ئەمڕۆ ژنێك تەلەفۆنی بۆ پۆلیسی كۆمەڵایەتی كردووە و گوتوویەتی مێردم كۆرۆنای هەیە، وەرن چارەسەری بكەن.

لەمبارەیەوە غالب عەتیە بەڕێوەبەری پۆلیسی كۆمەڵایەتی رایگەیاند كە دوای ئەوەی پشكنینیان بۆ مێردی ژنە كردووە، دەركەوت ژنەكە درۆی كردووە و مێردەكە هیچی نییە، بەڵام لە ترسی ئەوەی پیاوەكە ژنەكەی تەڵاق بدات و كێشە دروست بێت، پێیانرانەگەیاندووە كە ژنەكەی شكاتی لێ كردووە.

جێی باسە بەهۆی پەتای ڤایرۆسی كۆرۆناوە كێشەی كۆمەڵایەتیی زۆر لە وڵاتانی جیهان دروست بوون، ئەمەش لەبەر مانەوەی خێزانەكان بۆ كاتی دوور و درێژ لە ماڵەوە و بێكار مانەوەی زۆرینەی خەڵك.












باسنيوز