هاوپەیمانیی سائیرون، کە موقتەدا سەدری رێبەری رەوتی سەدر رێبەرایەتی دەکات، رایگەیاندووە، بە دوو مەرج پشتگیریی سەرۆک وەزیرانی راسپێردراوی عێراق دەکات.

ئەمڕۆ سێشەممە 31-3-2020، سادق سلیتی، پەرلەمانتاری هاوپەیمانیی سائییرون لە بەیاننامەیەکدا رایگەیاندووە، هاوپەیمانییەکەی بەشداریی کابینەی نوێی حکوومەتی عێراق بە سەرۆکایەتیی عەدنان زورفی ناکات.

سادق سلیتی هەروەها رایگەیاندووە، بە دوو مەرج پشتگیریی عەدنان زورفی دەکەن و دەنگ بە کابینەکەی دەدەن.

مەرجەکانی سائیرون:

- وەزیرەکان کەسانی پسپۆڕ و دەستپاک بن.

- بەرنامەی کابینەکە ببینن.

رۆژی 17-3-2020، بەرهەم ساڵح، سەرکۆماری عێراق لە کۆشکی کۆماری عەدنان زورفی، پارێزگاری پێشووی نەجەفی بۆ پێکهێنانی کابینەی نوێی حکوومەتی عێراق، راسپارد.




باسنیوز