گرووپێکی چەکداریی تیرۆریستی هێرشی کردووەتە سەر هێزێکی پۆلیسی فیدراڵی لە باشووری پارێزگای سەڵاحەدین، کە ناوچەکە دەکەوێتە باکووری بەغدای پایتەختی وڵاتەکەوە.

ئەمڕۆ یەکشەممە 29-3-2020، سەرچاوە ئەمنییە عێراقییەکان بڵاویان کردووەتەوە، کە چەکدارانی گرووپە تیرۆریستییەکە، کە تا ئێستا نەزانراوە سەر چ رێکخراوێکی تیرۆریستی بوون، هێرشیان کردووەتە سەر هێزەکانی پۆلیسی فیدراڵ لە باغەکانی باشووری سەڵاحەدین.

میدیا عێراقییەکان ئاماژە بەوە دەکەن، کە بەهۆی هێرشە تیرۆریستییەکەوە، چوار پۆلیس بریندار بوون.

بەهۆی ناکارایی هێزە ئەمنی و سەربازییەکانی عێراق، دەیان گرووپ و میلیشیای چەکداریی توندڕەو، تاوانکاری و تیرۆریستی لە بەغدا و شارەکانی دیکەی ئەو وڵاتە بڵاو بوونەتەوە، کە بە ئارەزووی خۆیان و بەپێی بەرژەوەندیی ئەو لایەنەی کاری بۆ دەکەن، کردەی تاوانکاری و تیرۆریستی ئەنجام دەدەن.










باسنیوز