پارێزگاری بەسرە رایگەیاند، تووشبوویەکی دیکە لە بەسرە گیانی لەدەستداوە، بەمەش کۆی گیانلەدەستدانی تووشبووانی کۆرۆنا لەو پارێزگایە گەیشتووەتە سێ کەس. بەڕێوەبەری تەندروستیی زیقاریش رایگەیاند، کەسێکی تەمەن 88 ساڵ بەهۆی کۆرۆناوە گیانی لەدەستداوە.

ئێوارەی رۆژی پێنجشەممە 19ی ئاداری 2020 ئەسعەد عیدانی، پارێزگاری بەسرە گیانلەدەستدانی سێیەم تووشبووی بەهۆی کۆرۆنا لە پارێزگاکە راگەیاند کە ئافرەتێکی گەڕاوەیە لە ‏ئێران.‏

پێشتر فەرمانگەی گشتیی تەندروستیی پارێزگای بەسرە رایگەیاند، تاوەكو ئێستا شەش تووشبوو بە ڤایرۆسی كۆرۆنا لە پارێزگاكە تۆماركراون، لەو ژمارەیەش دووانیان گیانیان لەدەستداوە، چواریشیان هێشتا لە نەخۆشخانەی بەسرە لەژێر چاودێریدان و یەكێكیشیان روو لە چاكبوونەوەیە.

عەباس تەمیمی، بەڕێوەبەری گشتیی فەرمانگەی تەندروستیی پارێزگای بەسرە گوتی "نەخۆشخانەكانی بەسرە بەردەوامن لە پێشوازیكردن لە تووشبووان بە ڤایرۆسی كۆرۆنا، بە بڕیاری لیژنەی پزیشكیش نەبێت كە لە شیكاری و پشكنینەكان پشتی پێدەبەسترێت، رێگە بە دەرچوونی هیچ تووشبوویەك نادرێت كەرەنتینەكان جێبهێڵن".

بەپێی دوایین وەزارەتی تەندروستیی عێراق، 192 کەس لە عێراق تووشی ڤایرۆسی کۆرۆنا بوون، لەو ژمارەیەش 13 کەسیان گیانیان لەدەستداوە و 49 کەسیان چاکبوونەتەوە.


رووداو