هاوپەیمانان زیانە مرۆییەکانی هێرشەکەی دوێنێی سەر سەربازگەی تاجی ئاشکرا دەکەن
کۆڵۆنێڵ مایلز بی کاجینز، گوتەبێژی هاوپەیمانیی نێودەوڵەتی لە بەیاننامیەکا، رایگەیاندووە، کاتژمێر 10:51 خولەکی سەرلەبەیانیی رۆژی شەممە 25 مووشەک ئاراستەی سەربازگەی تاجی کراوە.
مووشەکەکان 107 ملیمەتری بوون و بەهۆیەوە سێ سەربازی هاوپەیمانان و دوو سەربازی عێراقی، بریندار بوون.
فەرماندەیی ئۆپەراسیۆنە هاوبەشەکانی عێراقیش رایگەیاندووە، بە 33 مووشەک سەربازگەی تاجی کرایەوە ئامانج.
پێشتریش لە درەنگانی شەوی چوارشەممە 11-3-2020، بە 18 مووشەک سەربازانی سوپای ئەمریکا و بەریتانیا لە سەربازگەی تاجی لە باکووری بەغدا کرانە ئامانج و بەهۆیەوە دوو سەربازی ئەمریکی و سەربازێکی بەریتانی کوژران، جگە لە برینداربوونی 12 سەربازی دیکە.
دوای ئەو هێرشە مووشەکییە بۆ سەر سەربازگەی تاجی، فڕۆکە جەنگییەکانی ئەمریکا لە بەرەبەیانی رۆژی هەینی 13-3-2020، چەندین بارەگای میلیشیاکانی حەشدی شەعبییان بۆردومان کرد.
باسنیوز
