دوو حاڵەتی دیکەی تووشبوون بە ڤایرۆسی کۆرۆنا لە بەغدای پایتەختی عێراق، تۆمار کرا.

ئەمڕۆ شەممە 14-3-2020، عەبدولغەنی ساعدی، بەڕێوەبەری گشتیی تەندروستی کەرتی رەسافە لە بەغدا، لە بەیاننامەیەکدا رایگەیاندووە، دوو تووشبووەکەی ئەمڕۆ ژنن و لە نەخۆشخانەکانی کەنەدی و زەعفەرانییە تۆمار کراون.

عەبدولغەنی ساعدی هەروەها رایگەیاندووە، ئەو ژنەی لە نەخۆشخانەی زەعفەرانییە تۆمارکراوە، تووشی بەرزبوونەوەی پلەی گەرمی و هەناسەتەنگی بووە و لە برایەکی خۆیتووشی کۆرۆنا بووە، کە ئەو برایەی لە ئێران گەڕابووەوە.

بەڕێوەبەری گشتیی تەندروستی کەرتی رەسافە ئاماژەی بەوەش کردووە، کە ژنەکەی دیکە تەمەنی 72 ساڵە و پێش دوو هەفتە لە ئێران گەڕاوەتەوە.

بەپێی دوایین ئامار، تا ئێستا 73 کەس لە عێراق و 28 کەسیش لە هەرێمی کوردستان تووشی ڤایرۆسی کۆرۆنا بوون و لەو دوو ئامارەشدا، نۆ کەس گیانیان لەدەست داوە.











باسنيوز