کۆبوونەوە نائاساییەکەی پەرلەمانی عێراق بۆ دەنگدان لەسەر کابینەی نوێی حکوومەتی عێراق، بۆ مانگی داهاتوو دواخرا.

سەرچاوەیەکی سیاسیی ئاگادار بە ماڵپەڕی (ئیخبارییە)ی عێراقی راگەیاندووە، محەمەد حەلبوسیی سەرۆکی پەرلەمان پێشنیازی کردووە کۆبوونەوەکە بۆ رۆژی یەکشەممە 1-3-2020، دوابخرێ.

ئەو سەرچاوەیە هەروەها رایگەیاندووە، بڕیار دراوە ماوەی زیاتر بە لایەنە سیاسییەکان بۆ گفتوگۆکردن بدرێ، بۆیە کۆبوونەوەکە بۆ سەرەتای مانگی داهاتوو، دواخرا.

بڕیاربوو کاتژمێر 1ـی دوای نیوەڕۆی ئەمڕۆ پێنجشەممە 27-2-2020 پەرلەمانی عێراق کۆ ببێتەوە و تێیدا دەنگ بە کابینەی نوێی حکوومەتی عێراق بە سەرۆکایەتیی محەمەد عەللاوی، بدات، بەڵام بەهۆی ئمادەنەبوونی پەرلەمانتاران، کۆبوونەوەکە بۆ نیو کاتژمێر دواخرا و تا ئێستا دەستی پێنەکردووە.

تا ئێستا کورد و سوننە لە کابینەی محەمەد عەللاوی رازی نین و باس لەوە دەکەن، کە عەللاوی تاکڕەوی کردووە و حکوومەتەکەی بەبێ کورد و سوننە، پێک دەهێنێت.

شەوی شەممە 1-2-2020، سەرکۆماری عێراق، محەمەد تۆفیق عەللاوی بۆ پێکهێنانی حکوومەتی کاتیی وڵاتەکەی راسپارد، تاوەکو شوێنی عادل عەبدولمەهدی بگرێتەوە.

عەللاوی لە یەکەم لێدوانیدا، داوای لە خۆپیشاندەران کرد بەردەوام بن لە خۆپیشاندانەکانیان و رایگەیاند، ”ئەگەر نەتوانم داواکاریی خۆپیشاندەران بەجێ بهێنم، شایستەی ئەو پۆستە نیم“.

عادل عەبدولمەهدی (لەدایکبووی 1942 لە بەغدا)، لە مانگی 10ـی 2018 وەک سەرۆک وەزیرانی عێراق دەست بەکار بوو و لە رۆژی 30-11-2019 دەستی لەکار کێشایەوە و رۆژی دواتر پەرلەمانی وڵاتەکەی دەست لەکار کێشانەوەکەی قبوڵ کرد.

دەست لەکار کێشانەوەی عەبدولمەهدی لەسەر داوای مەرجەعی باڵای شیعەکانی عێراق و دوای پەرەسەندنی خۆپیشاندانەکانی وڵاتەکەی، هات.

خۆپیشاندانەکان لە رۆژی 1-10-2019ـەوە لە بەغدا و زۆربەی شارەکانی عێراق دژی گەندەڵی و نەبوونی خزمەتگوزارییە سەرەتاییەکانی ئاوی خواردنەوە و کارەبا و بێکاریی گەنجان، دەستیان پێکرد.

بەهۆی خۆپیشاندانەکان و کەوتنەوەی توندوتیژی تێیاندا، زیاتر لە 600 هاووڵاتی و کارمەندی ئەمنی گیانیان لەدەست داوە و زیاتر لە 16 هەزاری دیکەش بریندار بوون، جگە لە کەمئەندامبوونی 700 کەس و ژمارەکانیش بەردەوام لە بەرزبوونەوە دان.











باسنيوز