پەرلەمانتارێکی پێشووی پارتی لە پەرلەمانی عێراق رایدەگەیەنێت، کە هەرێمی کوردستان تایبەتمەندیی خۆی هەیە و پێویستە سەرۆک وەزیرانی راسپێردراوی عێراق رەچاوی بکات.

موحسین سەعدون، پەرلەمانتاری پێشووی عێراق بە میدیاکانی ئەو وڵاتەی راگەیاندووە، کورد بەشێوەیەکی گشتی نابێتە رێگر لەبەردەم پێکهێنانی کابینەی نوێی حکوومەتی عێراق، کە حکوومەتێکی کاتییە و کار بۆ ئەنجامدانی هەڵبژاردن دەکات.

موحسین سەعدون بە ئاماژەکردن بەوە لایەنە کوردستانییەکان بەتایبەت دوای کۆبوونەوەیان لەگەڵ نێچیرڤان بارزانی، سەرۆکی هەرێمی کوردستان یەکگرتوو و یەکدەنگن لەبارەی کابینەی نوێی حکوومەتی عێراق.

ئەو سیاسەتمەدارە پێی وایە پێویستە محەمەد عەللاوی، راسپێردراو بە پێکهێنانی کابینەی نوێی حکوومەتی عێراق رەچاوی تایبەتمەندیی هەرێمی کوردستان بکات و لەبارەی وەزیرە کوردەکان لە کابینەکەی، راوێژ بە سەرۆک بارزانی بکات.

شەوی شەممە 1-2-2020، سەرکۆماری عێراق، محەمەد تۆفیق عەللاوی بۆ پێکهێنانی حکوومەتی کاتیی وڵاتەکەی راسپارد، تاوەکو شوێنی عادل عەبدولمەهدی بگرێتەوە.

عەللاوی لە یەکەم لێدوانیدا، داوای لە خۆپیشاندەران کرد بەردەوام بن لە خۆپیشاندانەکانیان و رایگەیاند، ”ئەگەر نەتوانم داواکاریی خۆپیشاندەران بەجێ بهێنم، شایستەی ئەو پۆستە نیم“.

عادل عەبدولمەهدی (لەدایکبووی 1942 لە بەغدا)، لە مانگی 10ـی 2018 وەک سەرۆک وەزیرانی عێراق دەست بەکار بوو و لە رۆژی 30-11-2019 دەستی لەکار کێشایەوە و رۆژی دواتر پەرلەمانی وڵاتەکەی دەست لەکار کێشانەوەکەی قبوڵ کرد.

دەست لەکار کێشانەوەی عەبدولمەهدی لەسەر داوای مەرجەعی باڵای شیعەکانی عێراق و دوای پەرەسەندنی خۆپیشاندانەکانی وڵاتەکەی، هات.

خۆپیشاندانەکان لە رۆژی 1-10-2019ـەوە لە بەغدا و زۆربەی شارەکانی عێراق دژی گەندەڵی و نەبوونی خزمەتگوزارییە سەرەتاییەکانی ئاوی خواردنەوە و کارەبا و بێکاریی گەنجان، دەستیان پێکرد.

بەهۆی خۆپیشاندانەکان و کەوتنەوەی توندوتیژی تێیاندا، زیاتر لە 600 هاووڵاتی و کارمەندی ئەمنی گیانیان لەدەست داوە و زیاتر لە 16 هەزاری دیکەش بریندار بوون، جگە لە کەمئەندامبوونی 700 کەس و ژمارەکانیش بەردەوام لە بەرزبوونەوە دان.











باسنيوز