باڵوێزخانه‌ی ئه‌مریكا له‌ به‌غدا هۆشدارییه‌كی نوێ بۆ هاووڵاتییانی وڵاتەکەی له‌ عێراق بڵاو دەکاتەوە و داوایان لێده‌كات خۆیان به‌دوور بگرن له‌و ناوچانه‌ی خۆپێشاندانیان تێدا ڕێكده‌خرێت.

ئەمڕۆ دووشەممە 10-2-2020، باڵوێزخانه‌ی ئه‌مریكا له‌ به‌غدا، ئاگادارییەکدا له‌ هەژماری فه‌رمیی خۆی له‌ تۆڕی كۆمه‌ڵایه‌تی (فه‌یسبووک) بڵاو كردووه‌وه‌ و تێیدا ئاماژه‌ به‌وه‌ ده‌كات، چاوەڕێ دەکرێ رۆژانی 11، 12 و 13ـی ئه‌م مانگە خۆپیشاندانی به‌رفراوان له‌ به‌غدا بەڕێوە بخرێت.

باڵوێزخانه‌کە لەو بڕوایە دایە خۆپیشاندانەکە فراوان بێ و شاری نەجەفیش بگرێتەوە، بۆیە هۆشداریی داوە و داوا لە هاووڵاتییانی وڵاتەکەی دەکات ئاگاداری خۆیان بن.

هەر لە ئاگادارییەکەدا، باڵوێزخانەی ئەمریکا ئاماژەی بەوە داوە، کە بارەگای باڵوێزخانەی ئەمریکا لە بەغدا هەر بە داخراوی دەمێنێتەوە و هاووڵاتییانی ئەمریکی بۆ هەر کارێک، کە هەیانبێ، دەتوانن سەردانی کونسوڵخانەی وڵاتەکەیان لە هەولێری پایتەختی هەرێمی کوردستان بکەن.

پێشتر چەندین جار خۆپیشاندەرانی لایەنگری میلیشیاکانی حەشدی شەععبی هێرشیان کردووەتە سەر باڵوێزخانەی ئەمریکا و هەڕەشەی دەرکردنیان، کردووە.











باسنيوز