بەرپرسی سیاسەتەکانی دەرەوەی یەکێتی ئەوروپا رایگەیاند، پشتیوانی لە محه‌مه‌د تۆفیق عه‌لاوی، سه‌رۆك وه‌زیرانی راسپێردراو بۆ پێكهێنانی حكومه‌تی عێراق دەکەن و دیاریکردنی ئەو عەلاوی به‌هه‌نگاوێكی گرنگی بۆ دۆخی سیاسی عێراق و ناوچه‌كه‌ ناودەبات.

جۆزێپ بۆریل، بەرپرسی سیاسەتەکانی دەرەوەی یەکێتی ئەوروپا له‌به‌یاننامه‌یه‌كدا رایگه‌یاند، "دیاریكردنی محه‌مه‌د تۆفیق عه‌لاوی، بۆ پۆستی سه‌رۆك وه‌زیران، هه‌نگاوێكی گرنگه‌ به‌ئاڕاسته‌ی چاره‌سه‌ری كێشه‌ سیاسیی و كه‌ڵه‌كه‌بوه‌كانی عێراق".

پێویسته‌ عێراق به‌شێوه‌یه‌كی به‌په‌له‌ حكومه‌تێكی چالاك پێكبهێنێت، به‌جۆرێك ئه‌وله‌ویه‌تی كاره‌كانی بۆ چاكسازی و هه‌ڵبژاردنێكی نوێ بێت


ئاماژەی بەوەشکردوە، پێویسته‌ عێراق به‌شێوه‌یه‌كی به‌په‌له‌ حكومه‌تێكی چالاك پێكبهێنێت، به‌جۆرێك ئه‌وله‌ویه‌تی كاره‌كانی بۆ چاكسازی و هه‌ڵبژاردنێكی نوێ بێت.

ئێوارەی یەکی شوباتی ئەمساڵ، د. بەرهەم ساڵح، سەرۆک کۆماری عێراق نامەی راسپاردنی بۆ سەرۆکایەتیکردنی کابینەی نوێی حکومەتی عێراق پێشکەشی محەمەد تۆفیق عەلاوی کرد.

جەخت دەکەینەوە لە رەخساندنی گەورەترین دەرفەتی هەلی کار بۆ هاوڵاتیان و دەستپێکردنەوەی پڕۆژە پیشەسازییەکان و بەگەڕخستنەوەی وەربەرهێنان


محەمەد تۆفیق عەلاوی، سەرۆک وەزیرانی راسپێردراوی عێراق لە وتارێکدا دوای راسپاردنی رایگەیاند، "جەخت دەکەینەوە لە رەخساندنی گەورەترین دەرفەتی هەلی کار بۆ هاوڵاتیان و دەستپێکردنەوەی پڕۆژە پیشەسازییەکان و بەگەڕخستنەوەی وەربەرهێنان، بە جۆرێک پشت بەستن بە نەوت کەمتر بکەینەوە".

ئاماژەی بەوەشکرد، "جەخت لە روبەڕوبونەوەی گەندەڵی و هەڵوەشاندنەوەی دەستە ئابورییە جیاوازەکان و لێکۆڵینەوە لە ئاسایش و ئارامی گەل و هاوڵاتیان دەکەینەوە، هەروەها عێراق دەپارێزین لە هەر دەستوەردانێکی دەرەکی و رێگەنادەین ببێتە گۆڕەپانی یەکلایی کردنەوەی ململانێکان".





خەندان