سەرۆك وەزیرانی راسپێردراوی عێراق، پەیامێك ئاراستەی خۆپیشاندەران دەكات و ھۆشداری دەدات لەوەی عێراق بەرەو ئاقارێكی نادیار دەچێت.

محەمەد تۆفیق عەللاوی، سەرۆك وەزیرانی راسپێردراوی عێراق، لە پەیامێكدا بۆ خۆپیشاندەران ئاماژە بەوە دەكات، خۆپیشاندانەكان ئەنجامی باشیان ھەبووە، وایكردووە یاسای نوێی ھەڵبژاردنەكان دەربكرێت و كۆمسیۆنێكی نوێی ھەڵبژاردنەكان پێكبێت. ھەروەھا وایكردووە، كەسانی دووبارەی ناو گۆڕەپانی سیاسەت دووبارە نەبنەوە.

ئەوەشی خستەڕوو، ئەو یەكێك لەو كەسە سەربەخۆیانە بووە، كە لەلایەن پەرلەمانتاران و خۆپیشاندەرانەوە پێشنیاز كراوە.

عەللاوی، لە پەیامەكەیدا باسی لەوەشكردووە، كەسانێگی گەندەڵ خەریكی دروستكردنی پروپاگەندە و ئاژاوەن، بۆیە داوا لە ھەموو خەڵكی عێراق و خۆپیشاندەران دەكات، بەرامبەر ئەو كەسانە یەكگرتووبن و رێگە نەدەن پڕوپاگەندە كاریان تێبكات، چونكە ئاژاوەی زیاتر عێراق بەرەو ئاقارێكی نادیار دەبات و دوایدەخات و ئەو دەستكەوتانەش كە بەدەستھاتوون، دەیانخاتە مەترسییەوە.

ئەو پەیامەی عەللاوی، لە كاتێكدایە بەشێك لە خۆپیشاندەران راسپاردنی ناوبراو بۆ سەرۆك وەزیران رەتدەكەنەوە.




K24