سەرکۆمار بەرپرسێکی ئەمنی بۆ جێگرتنەوەی عەبدولمەهدی رادەسپێرێت

سەرکۆمار بەرپرسێکی ئەمنی بۆ جێگرتنەوەی عەبدولمەهدی رادەسپێرێت
سەرکۆماری عێراق بەرپرسێکی ئەمنیی وڵاتەکەی بۆ جێگرتنەوەی عادل عەبدولمەهدی، رادەسپێرێت.

ماڵپەڕی سۆمەرییە نیوز) ئەمڕۆ پێنجشەممە 30-1-2020، لە زاری سەرچاوەیەکی سیاسییەوە بڵاوی کردووەتەوە، کە ئەگەر لایەنە سیاسییەکان نەگەنە رێککەوتنی کۆتایی لەبارەی سەرۆک وەزیرانی نوێ، ئەوا بەرهەم ساڵح، سەرکۆماری عێراق کەسایەتییەکی دیکە رادەسپێرێت.

ئێوارەی رۆژی چوارشەممە میدیا عێراقییەکان بڵاویان کردەوە، کە لایەنە شیعییەکان رێک کەوتوون لەسەر دیاریکردنی محەمەد تۆفیق عەللاوی وەک سەرۆک وەزیرانی نوێی عێراق.

ئەو سەرچاوەیە ئاماژەی بەوە کردووە، کە ئەگەر لایەنە سیاسییەکان نەگەنە رێک کەوتن، ئەوا سەرکۆمار مستەفا کازمی، سەرۆکی دەزگای هەواڵگریی عێراقی بۆ پێکهێنانی حکوومەتی نوێ، رادەسپێرێت.

عادل عەبدولمەهدی (لەدایکبووی 1942 لە بەغدا)، لە مانگی 10ـی 2018 وەک سەرۆک وەزیرانی عێراق دەست بەکار بوو و لە رۆژی 30-11-2019 دەستی لەکار کێشایەوە و رۆژی دواتر پەرلەمانی وڵاتەکەی دەست لەکار کێشانەوەکەی قبوڵ کرد.

دەست لەکار کێشانەوەی عەبدولمەهدی لەسەر داوای مەرجەعی باڵای شیعەکانی عێراق و دوای پەرەسەندنی خۆپیشاندانەکانی وڵاتەکەی، هات.

خۆپیشاندانەکان لە رۆژی 1-10-2019ـەوە لە بەغدا و زۆربەی شارەکانی عێراق دژی گەندەڵی و نەبوونی خزمەتگوزارییە سەرەتاییەکانی ئاوی خواردنەوە و کارەبا و بێکاریی گەنجان، دەستیان پێکرد.

بەهۆی خۆپیشاندانەکان و کەوتنەوەی توندوتیژی تێیاندا، زیاتر لە 600 هاووڵاتی و کارمەندی ئەمنی گیانیان لەدەست داوە و زیاتر لە 16 هەزاری دیکەش بریندار بوون، جگە لە کەمئەندامبوونی 700 کەس و ژمارەکانیش بەردەوام لە بەرزبوونەوە دان.












باسنيوز

Top