لەگەڵ نزیکبوونەوەی کاتی تەواوبوونی مۆڵەتی خۆپیشاندەران، خۆپیشاندانەکانی عێراق فراوان دەبن و زانکۆ و فەرمانگەکان دادەخرێن.

هەفتەی رابردوو، خۆپیشاندەرانی شاری ناسریەی سەنتەری پارێزگای زیقار مۆڵەتی یەک هەفتەیان بە حزب و لایەنە عێراقییەکان دا، کە تا سەرلەبەیانیی رۆژی دووشەممە 20-1-2020 کەسێک بۆ سەرۆکایەتیی حکوومەتی وڵاتەکەیان دیاری بکەن، ئەگەرنا ناڕەزایی و خۆپیشاندانەکان فراوانتر دەکەن.

رەوشی خۆپیشاندانەکانی شارەکانی عێراق لەمڕۆ یەکشەممە 19-1-2020:

بەغدا

خۆپیشاندەران بە سووتاندنی تایە، گۆڕەپانەکانی تەحریر، قوڕتوبە و تەیەڕانیان داخست.

ناسریە

لە شاری ناسریەی سەنتەری پارێزگای زیقار دەرگای قوتابخانەکان داخران.

نەجەف

خۆپیشاندەرانی شاری نەجەفی سەنتەری پارێزگای نەجەف بە سووتاندن تایە، گۆڕەپانی زەهرایان لە ناوەڕاستی شارەکە داخستووە و بە لەحیم دەرگای فەرمانگەکانی دەوڵەت، گیراون.

سەماوە

لە شاری سەماوی سەنتەری پارێزگای موسەننا، مانگرتنی قوتابییان بەردەوامە و دەرگای زانکۆ و فەرمانگەکان داخراون. هەروەها خۆپیشاندەران بە سووتاندنی تایە، چوارڕیانی سەرەکیی شارەکەیان داخست.

واست

لە شاری واستی سەنتەری پارێزگای واست مانگرتنی زانکۆ و قوتابخانە دواناوەندییەکان و فەرمانگەکانی دەوڵەت، بەردەوامە

دیوانییە

لە شاری دیوانییەی سەنتەری پارێزگای قادسییەش مانگرتنی زانکۆ و قوتابخانە دواناوەندییەکان و فەرمانگەکانی دەوڵەت، بەردەوامە.

خۆپیشاندانەکان لە رۆژی 1-10-2019ـەوە لە بەغدا و زۆربەی شارەکانی عێراق دژی گەندەڵی و نەبوونی خزمەتگوزاری، دەستیان پێکرد.

بەهۆی خۆپیشاندانەکان و کەوتنەوەی توندوتیژی تێیاندا، زیاتر لە 600 هاووڵاتی و کارمەندی ئەمنی گیانیان لەدەست داوە و زیاتر لە 16 هەزاری دیکەش بریندار بوون، جگە لە کەمئەندامبوونی 700 کەس و ژمارەکانیش بەردەوام لە بەرزبوونەوە دان.




باسنيوز