چەکدارانی رێکخراوی تیرۆریستی داعش هێرشیان کردە سەر یەکەیەکی پاسەوانی سنووری عێراقی.

بەپێی زانیارییە میدیاییەکان، چەکدارانی داعش لە بەرەبەیانی ئەمڕۆ سێشەممە 14-1-2020 هێرشیان کردووەتە سەر بارەگای فەوجی یەکی سەر بە فەرماندەیی پاسەوانی سنور لە نزیک دەروازەی وەلید لەسەر سنووری سووریا.

لە ئەنجامی هێرشەکەی داعش، کە دەگوترێ لە خاکی سووریاوە کردوویانەتە سەر هێزە عێراقییەکە، ئەفسەرێکی عێراقی بە پلەی نەقیب، کوژراوە.

زانیارییەکان ئاماژە بەوە دەکەن، کە رووبەڕووبوونەوەیەکی توند لە نێوان چەکدارەکانی داعش و هێزە عێراقییەکە دروست بووە و چەکدارە تیرۆریستەکان بۆ ناو قوڵایی خاکی سووریا، پاشەکشەیان کردووە.



باسنیوز