بۆ یەكەمجار خانمە ئەكتەرو سەماكاری پێشووی شاشەی میسری (نەجوا فوئاد) باسی دووركەوتنەوەی خۆی دەكات لە سەماكردن .

لە چاوپێكەوتنێكیدا (نەجوا فوئاد) باسی بەشێك لە كارە هونەرییەكانی خۆی كرد لە ڕابردوودا, نەجوا ئاماژەی بەوەدا كە ئەو لە سەماكردندا هونەری پێشكەش كرد نەك خۆدەرخستن و ووروژاندن بۆ ڕاكێشانی سەرنجی پیاوان بەلای خۆیدا, هەروەها دەڵێت كە لەكاتی سەماكردن جل و پۆشاكی شیاوی بەكاردەهێناو , بەڵام سەبارەت بە ئێستا نەجوا فوئاد گووتی كە ئەو سەماكردن و میوزیكی سەمای بەجۆرێك لەبیرچووەتەوە كە ناتوانێ بەتەنهاش سەما بكات .

هەروەها لەبەشێكی دیكەی قسەكانیدا ڕایگەیاند كە لە ڕابردوودا وەكو سەماكار كاری لەگەڵ چەندین ئاوازدانەرو هونەرمەندی بە ئەزموون كرد كە ئەمەش بووە دەرفەتێك بۆ ئەوەی زیاتر بناسرێت و ناوبانگی هەبێت .

(نەجوا فوئاد)ی تەمەن 82 ساڵ, سەرەتای كاركردنی لە بواری هونەردا وەكو سەماكار دەركەوت, بەڵام لە دواییدا توانی بەشداری لە چەند فیلمێكی سینەمایی بكات و ڕۆڵی سەرەكی ببینێت, كە بەمەش توانی ناوبانگی زیاتر دەربكات و كۆمپانیایەكی تایبەت بە بەرهەمهێنانی فیلمی سینەمایی دابمەزرێنێت, ساڵی 1997 وازهێنانی خۆی لە سەماكردن ڕاگەیاند, تاوەكو ئێستا 15 جار هاوسەرگیری كردووە .