ئەكتەرو دەرهێنەری ئەمریكی ڤین دیزڵ بواری هونەری گۆرانی تاقی دەكاتەوە .

پالەوانی زنجیرە فیلمی ئاكشن(fast and furious), (ڤین دیزڵ)ی تەمەن 53 ساڵ, كارێكی جیاواز تاقی دەكاتەوەو بە هاوكاری(kygo) یەكەم گۆرانی تایبەت بەخۆی لە ژێر ناونیشانی (FEEL LIKE I DO) بڵاو كردەوە .

لە چەند ڕۆژی ڕابردوو ئەم ناودارە لە هەژماری تایبەتی خۆی لە تۆڕی كۆمەڵایەتی ئەنستگرام وێنەیەكی بڵاوكردەوەو ئاماژەی بەوەدا كە ئەو ماوەیەكی زۆرە كار لەسەر میوزیك دەكات و ئێستا پێویستی بەوەیە كە شوێنی پشوودانەكەی جێ بهێڵێت و سەرەتایەكی تر تاقی بكاتەوە, هەروەها سوپاسگوزاری هەوادارەكانی كرد بۆ پاڵپشتی و پێشوازییان لەو بڕیارەی .

ئەم هەنگاوەی دەگەڕێتەوە بۆ ئەوەی كە ڤین دیزڵ بۆی دەركەوت بەهۆی بڵاوبوونەوەی پەتای كۆرۆنا سەرەڕای ماسك و خۆپارێزی, درووستكردنی فیلمی سینەمایی بە قورسی ئەنجام دەدرێت و ماوەیەكی زۆرە لە جەماوەرەكەی دوور كەوتووەتەوە, بۆیە ڤین دیزڵ بەباشی دەزانێت كە بە بڵاوكردنەوەی گۆرانی لە هەوادارانی نزیك ببێتەوە .

لەماوەكانی ڕابردوو چەند جارێك ڤین دیزڵ وەكو ئەكتەرێك دەركەوتووە كە گۆرانی لە سەر ستێج چڕیوە, لە ساڵی2015 كاتی بەڕێوەچوونی دبەشكردنی خەڵاتەكانی (Mtv) ئەم ناودارە گۆرانییەكی پێشكەش بە "پۆڵ وۆكەر"ی هاوڕێ كۆچكردووەكەی كرد .