لە هەڵمەتێكی خێرخوازیدا, دوای كوژرانی جۆرج فلۆید لە ویلایەتە یەكگرتووەكانی ئەمریكا بە دەستی پۆلیسەوە, بەشێك لە ئەستێرەو هونەرمەندان هەستان بە پاڵشتیكردنی ئەو ڕێكخراوو دامەزراوانەی كە تایبەتن بە بەرەنگاربوونەی ڕەگەز پەرستی و بەرزكردنەوەی دەنگی ماف خوراوان بە ڕووی حكومەتی ئەو وڵاتە .

لە ئێستادا لە ماڵپەڕە جیهانییەكانەوە بڵاوكراوەتەوە كە یاریزانی پێشووی تۆپی سەبەتەو پاڵەوانی جیهانی (مایكڵ جۆردن), بڕی 100 ملیۆن دۆلار دەبەخشێت لە پێناو بەرەنگاربوونەوەی ڕەگەزپەرستی و كاركردن بۆ بەدیهێنانی سەروەری یاسا لە كۆمەڵگای ئەمریكا, هەروەها ڕەخساندنی دەرفەتی خوێندن بۆ هەژاران, بەم پێیە ئەو بڕە پارەیە بەسەر چەند ڕێكخراو و دەزگایەك دابەشدەكرێت كە كارو چالاكییەكانیان جیاوازن .

هەروەها پلانەكە بەشێوەیەكە كە ئەو 100 ملیۆن دۆلارە لە ماوەی 10 ساڵ دابەش دەكرێت, ئەویش بە هەماهەنگی لە نێوان مایكڵ جۆردن و (جۆردن براند) .

شایەنی باسە..لە هەمان شێوەی ئەم كاروچالاكییە خێرخوازییە گروپی گۆرانی(BTS)ی كۆریای باشوور, وەكو هەڵوێستێك بۆ ئەو ڕووداوەی جۆرج فلۆید ئەوانیش بڕی یەك ملیۆن دۆلاریان بەخشی, لە پێناو بەرەنگاربوونەوەی ڕەگەزپەرستی و داواكردنی مافی ڕەشپێستەكان .