ئەستێرەیەكی دیاری بۆڵیوود كۆچی دوایی كرد
عیرفان خان ئەمڕۆ چوارشەممە 29/4/2020 لە یەكێك لە نەخۆشخانەكانی "مۆمبای"ی وڵاتی هیندستان بە هۆی نەخۆشی شێرپەنجەوە كۆچی دوایی كرد, ووتەبێژێكی ئەم ناودارە لە مانگی 3ی 2018 جۆری نەخۆشییەكەی ڕاگەیاند و لەو كاتەوە دەرمان و چارەسەرییەكانی وەردەگرت, عیرفان خان توانی بەم شێوەیە بتوانێت لە بواری سینەمادا بەردەوام بێت تاكو دوایین فیلمی كە بریتییە لە (Angrezi Medium) بەڵام بە هۆی بڵاوبوونەوەی پەتای كۆرۆنا نمایشكردنی دواخرا, لەم فیلمەدا لە پاڵ عیرفان خان هەریەك لە كارینا كاپوور و رادیكا مادان و دیپاك دوبریال و چەند ئەكتەرێكی دیكە تێیدا بەشدارن .
سەرەتای كاری هونەری ئەم هونەرمەندە لە بواری سینەمادا دەگەڕێتەوە بۆ ساڵی 1988 لە فیلمی (salaam bombay), وە لە دواییدا توانی لە چەندین فیلمی سینەماییدا بەشدار بێت لەوانەش, فیلمی ئەمریكی (Inferno) كە ساڵی 2016 بەرهەم هات هەریەك لە عیرفان خان و تۆم هانكس و فالیسیتی جۆنز و چەندین ئەكتەری دیكە تێیدا بەشدار بوون, هەروەها فیلمی (black mail) كە ساڵی 2018 بەرهەم هات, وە ساڵی 2009 لە فیلمی (billu) كە یەكێكە لە فیلمە بەهێزەكانی بۆڵیوود و چەندین ئەستێرەی تێدا دەردەكەون لەوانەش شارۆخان- كارینا كاپوور- پریانكا چۆپرا - لارا دوتا و چەندین ئەكتەری دیكە .
