خانمە گۆرانیبێژی ئەمریكی و ئەستێرەی پۆپی جیهانی (مادۆنا)ی تەمەن 61 ساڵ, لە تۆڕی كۆمەڵایەتی ئەنستگرام كورتە ڤیدیۆیەكی بڵاوكردەوە كە تێیدا مادۆنا لە ژوورێكی تاریكدا لەكاتی نووسینەوەی یادەوەرییەكانی ڕایگەیاند ئەو ئێستا بە بارودۆخێكی ناخۆشدا تێدەپەڕێت, ئەویش بە هۆی ئەوەی تەنها لە ماوەی 24 كاتژمێردا بە هۆی پەتای كۆرۆنا 3 كەسی لە دۆست و هاوڕێیانی نزیكی لەدەستداوە, كە ئەمەش بە شێوەیەك كاریگەری لەسەر هەبووە نەیتوانیوە بخەوێت و بە درێژایی ئەو ڕۆژە بە خەبەر بووە .

لە ئێستادا ڤایرۆسی كۆرۆنا لە ئەمریكا بە شێوەیەكی مەترسیدار بڵاوبووەتەوە, بەم هۆیەوە ژمارەیەكی زۆری هاوڵاتیانی ئەو وڵاتە گیانیان لەدەستدا, مادۆنا ڕایگەیاند كە بە هۆی ڤایرۆسی كۆرۆنا 3 كەسی لە هاوڕێ و خۆشەویستانی لەدەستدا, كە ئەوانیش كوڕی مامی كە دەكاتە ئامۆزای, وە برای پاسەوانە تایبەتییەكەی و میوسیزیان (ئۆرلاندۆ پویرتا) كە لە ڕابردوودا لە چەندین گۆرانی هاوكاری بوو, بەم هۆیەوە مادۆنا دڵتەنگی خۆی بە هەوادارانی ڕاگەیاند و ئاماژەی بەوەدا كە ئەو ئێستا بە كاتێكی ناخۆشدا تێدەپەڕێت .

شایەنی باسە..مادۆنا لە چەند هەفتەی ڕابردوو ملیۆنێك دۆلاری بەخشی لە پێناو بەرەنگاربوونەوەی پەتای كۆرۆنا, هەروەها دوپاتی كردەوە كە پێویستە ڕێنماییە تەندرووستییەكان جێبەجێ بكەین و بە ووریاییەوە مامەڵە لەگەڵ بارودۆخەكەدا بكەین .