دوای ئەوەی ئەكتەرو ئەستێرەكانی هۆڵیوود, هاوكاربوون لە بەرەنگاربوونەوەی پەتای كۆرۆنا لە ئەمریكا, لە ئێستادا هەواڵی ئەوە بڵاوبووەتەوە كە ئەكتەرو چالاكوانی ئەمریكی (ئۆپرا وێنفری) 10 ملیۆن دۆلاری بەخشی لە پێناو بەرەنگاربووونەوەی ڤایرۆسی كۆرۆناو گەیاندنی خۆراك بۆ ئەو كەسانەی كە لەم بارودۆخەدا پێویستیان بە هاوكاری هەیە, بەم هۆیەوە ئۆپرا لە ڕێزبەندی یەكەمە لە نێو ئەكتەرو ئەستێرەكانی ئەمریكا .

ئەو ناودارو ئەكتەرانەی كەلەم چەند ڕۆژەی ڕابردوودا دەستی هاوكاریان پێشكەش كرد بریتین لە...

ميوزیسیان و خانمە گۆرانیبێژی ئەمریكی (دۆڵی پارتۆن) دوای ئەوەی لە تۆڕە كۆمەڵایەتییەكان بەرنامەیەكی دامەزراند, كەلە دڕەنگانی شەودا بە شێوەی هەفتانە زنجیرە چیرۆكێك بۆ منداڵان دەگێڕێتەوە, پارتۆن یەك ملیۆن دۆلاری بەخشییە سەنتەرێكی پزیشكی لە زانكۆی ڤاندربێڵت لە "ناشفیل"ی ویلایەتی تینیسی, لە پێناو دۆزینەوەی دەرمانی چارەسەر بۆ بەركەوتوانی پەتای كۆرۆنا .

وە لە بیرۆكەیەكی جیاواز, ئەكتەری دیاری فیلمی(game of thrones) ئەمیلیا كلاركی تەمەن 33 ساڵ لە پێناو بەرەنگاربوونەوەی لە ڤایرۆسی كۆرۆنا دوورە پەرێزی خۆی لە هەوادارانی دەشكێنێت, ئیمیلیا لە تۆڕی كۆمەڵایەتی ئینستگرام ڕایگەیاند كە ئەو 12 خۆبەخش بە شێوەی هەڕەمەكی هەڵدەبژێرێت و پێكەوە خواردن دەخۆن و قسەو باس دەكەن, بەڵام مەرجی ئەوەی لەسەر ئەم دیدارە ئەوەیە كە هەر كەسێك بووە مێوانی پێویستە بڕێك پارە ببەخشێت, كە ئەو پارەیەش بەشێكی دەبێتە هاوكاری بۆ ئەوانەی كە تووشی جەڵتەی مێشك هاتوون, وە بەشەكەی دیكەشی لە نەخۆشخانەكاندا بۆ تووشبوانی ڤایرۆس كۆرۆنا تەرخان دەكرێت .

هەروەها خانمە گۆرانی بێژی ئەمریكی ڕیهانای تەمەن 32 ساڵ, لە ڕێی دەزگای(كلارا لیۆنیل) بڕی 5 ملیۆن دۆلاری بەخشی .

وە هەردوو ئەكتەری ئەمریكی (ڕیان رینۆڵدز و بڵێیك لێڤڵی )ی هاوسەری یەك ملیۆن دۆلاریان بەخشی .

وە خانمە ئەكتەرو گۆرانیبێژ "كریستین بێڵ"ی پاڵەوانی فیلمی(veronica mars) كە ساڵی 2014 نمایشكرا, 150 هەزار دۆلاری بەخشییە سندوقی(no kid hungry), لەلایەكی تریشەوە كریستین و هاوژینەكەی بڕیاری لێخۆشبوونیاندا بە كرێچییەكانیان لە یەكەی نیشتەجێبوون و باڵەخانەكانیان لە لوس ئەنجلوس بۆ ماوەی مانگێك .

وە كۆمپانیای (Haus Labs) تایبەت بە ماكیاژ و كەرەستەی جوانكاری, كە لەیدی گاگا خاوەنداریەتی دەكات, لە تۆڕی كۆمەڵایەتی ئانستگرام بڵاویكردەوە كە ئەم ئەستێرەیە لە سەدا بیستی قازانجەكانی بەخشیوە لە هەردوو ویلایەتی نیویۆرك و لۆس ئەنجلوس .

هەروەها جاستن بەیبەر 29000 هەزار دۆلاری بەخشییە دەزگایەكی تایبەت بە كاروباری منداڵان لە وڵاتی چین, هەروەها چەند ئەكتەرو ناودارێك پاڵپشتی خۆیان ڕاگەیاند بێ ئەوەی بڕی هاوكارییەكە دیاری بكەن لەوانەش, گۆرانیبێژ جاستن تمبرلینك - نووسەرو پێشكەشكار جیمی فاڵۆن- ئەكتەر و گۆرانیبێژ ڤانێسا هادجنز .