هونەری كوردی لە هەر پارچەیەكی كوردستان بە هۆی دابەشكردنی كوردستان بەسەر چوار پارچەوە كاریگەر بووە بە كولتوور و هونەری ئەو پارچەیە، چونكە هونەرمەندان بەهۆی كۆت و بەندەكانی سەر زمان، رووبەڕووی ئاستەنگی زۆر دەبنەوە بۆ بەردەوامیدان بە كاری هونەری، بەڵام هونەرمەندانی كورد بە بەردەوامیدان بە كارەكانیان، توانیویانە زمانی كوردی بپارێزن و پەرەی پێ بدەن، تەنانەت هەندێك لەو هونەرمەندانە جگە لە زمانی كوردی بە زمانی میللەتانی دیكەش بەردەوام بوون لە كارەكانیان و ئێستا لە وڵاتانی دیكەش خاوەن ناوبانگ و جەماوەری خۆیانن، یەكێك لەو هونەرمەندانە كە توانیی بە هەردوو زمانی كوردی و فارسی لە هونەرەكەیدا سەركەوتوو بێت، هونەرمەندی رۆژهەڵاتی كوردستان (جەمشید)ی خەڵكی شاری سنەیە.


جەمشید یەكێكە لەو هونەرمەندانەی كە بەشداریی لە شاكاری پێشمەرگەی (هونەرمەند دڵشاد سەعید) كرد. لەم بارەوە دەڵێت: «بە شانازییەوە یەكێك بووم لە هونەرمەندە بەشداربووەكانی هەردوو شاكاری شنگال و پێشمەرگە، ئەم دوو شاكارە جگە لە لایەنی نەتەوەیی، كارێكی جیهانییە كە مامۆستا دڵشاد ئەنجامی داوە، كە لە تێكستی مامۆستا (ئەدیب چەلكی)یە، ئەم پرۆژەیە بۆ پێش هێرشی تیرۆریستانی داعش دەگەڕێتەوە»، هەروەها دەڵێت: «هونەر كارێكی پیرۆزە، ئەركی هونەرمەندیش لە بواری خۆیدا وەك پێشمەرگە وایە و بەو چەكەی كە لە دەستیدایە، كە ئەویش دەنگیەتی، پەیامی میللەتەكەی دەگەیەنێت، هەروەها لەو رێگەیەوە پەیامەكەی بگەیەنێ بە خەڵك و نەوەكانی داهاتوو، بۆ ئەوەی ئەو كەسانە بناسن كە بەدرێژایی مێژوو خەباتیان بۆ میللەتەكەیان كردووە، چونكە زۆر كەس هەن ئاشناییان دەربارەی مێژووی خەڵكی كوردستان و قارەمانەكانی لە هەموو پارچەكان نییە»، جەمشید لە درێژەی قسەكانیدا دەڵێت: «میللەتی كورد هەمیشە لە ژێر زوڵم و زۆرداریی دوژمناندا بووە، من خۆم وەك هونەرمەندێك لە نێو ئەو زوڵم و زۆردارییەدا گەورە بووم، بۆیە من و هەموو هونەرمەندەكانی دیكەش ئەركی سەرشانمانە كە گوزارشت لەو زوڵم و زۆردارییە بكەین كە لەسەر میللەتەكەمان هەبووە».
جەمشید باس لە سەرەتاكانی كاری هونەریی خۆی دەكات و لەو بارەیەوە دەڵێت: «من لە سنە بۆ خوێندن چوومە تاران، لەوێ بەشی ئەندازیاریی تەلارسازیم خوێند، لە تاران گرووپی میوزیكی سنەییەكان یەكمان گرت و ئێمەش وەكو گرووپی عەندەلیبییەكان و كامكاران و چەند ژەنیارێكی ناوداری دیكە كاری زۆر باشمان كرد، سەرەتا تا ساڵی (2000) لە ستایلی فۆلكلۆر كارم دەكرد، ئیدی لەو ساڵەوە ئێرانم بەجێهێشت و نەگەڕامەوە، ماوەی (20)ساڵە لە سنە و رۆژهەڵاتی كوردستان دوورم و چەند ساڵێكیشە لە پاریس دەژیم و یەكەمین ئەلبوومی گۆرانیشم لە ئەمریكا بەناوی (نەخشی زیبا) لە ساڵی (2001) بڵاوكردەوە، ئەو كات دەنگدانەوەیەكی زۆر باشی هەبوو، چونكە بە تەكنیك و ئەدایەكی زۆر نوێ كارمان لەسەر كردبوو، لەنێو تاراوگەنشینان پێشوازییەكی زۆر باشی لێكرا، پاشان ئەلبوومی (خۆش ئامەدی) و ئەلبوومی (ئەڤەلین نیگا) و ئەلبوومی سانیهام بڵاوكردەوە، دواتر زیاتر لە (60) گۆرانیم بە شێوازی سینگل بڵاوكردەوە، لە هەر ئەلبوومێكیشدا گۆرانییەك، یان دوو گۆرانیم بە كوردی بڵاو دەكردەوە، تاوەكو ئێستا خاوەنی هەشت ئەلبوومی گۆرانیم، ئەمەش جگە لە گۆرانییە سینگڵەكان».
جەمشید وەك هونەرمەندانێكی كورد كە گۆرانیی بە هەردوو زمانی فارسی و كوردی گوتووە، دەڵێت: «من هەمیشە شانازی بە كوردبوونی خۆمەوە دەكەم، بڵاوكردنەوەی گۆرانیی كوردی لە نێو ئەلبوومەكانمدا بۆ ئەوە بوو كە بە خەڵك بڵێم من كوردم، بەڵام بە زمانێكی دیكە گۆرانی دەڵێم، زۆربەی بینەران و بیسەرانی من فارس بوون، بەڵام لەگەڵ ئەوەشدا گۆرانیی كوردیم لە كۆنسێرت و ئاهەنگەكاندا دەگوت و باسم لەوەش دەكرد كە من هونەرمەندێكی كوردم و مێژوو و زمان و فەرهەنگی خۆمم هەیە، من پێموایە گۆرانیبێژ بە زمانەكانی دیكەش گۆرانی بڵێت باشە، بۆیە بە زمانی ئەرمەنی و توركییش گۆرانیم گوتووە، بۆ ئەوەی پەیامی هونەرمەندان بە هەموو زمانێك بڵاوبكرێتەوە».
جەمشید وەكو یەكەمین هونەرمەندی كورد لە هۆڵی دۆلبی لە لۆس ئەنجلس كۆنسێرتی كردووە، لەم رووەوە دەڵێ: «ئاشكرایە هۆڵی دۆلبی، یەكێكە لە گرانترین هۆڵەكانی لۆس ئەنجلس كە هەموو ساڵێك رێوڕەسمی دابەشكردنی خەڵاتەكانی ئۆسكاری تێدا بەڕێوەدەچێت، لەگەڵ ئەوەشدا تەنیا سوپەرستارەكان دەتوانن لەم هۆڵە كۆنسێرت بكەن، بە خۆشحاڵییەوە منیش چانسی ئەوەم هەبوو وەكو یەكەمین هونەرمەندی كورد گۆرانی و میوزیكی كوردی لەم هۆڵە بەناوبانگەدا بچڕم، كە زیاتر لە 70 سەماكار لەگەڵ گۆرانییەكانی من سەمایان دەكرد، لەگەڵ 30 ژەنیاری ناودار كە میوزیكیان بۆ من دەژەنی، هاوكات زیاتر لە 3500 كەس لەم هۆڵەدا ئامادە بوون، یەكێك بوو لە سەركەوتووترین كۆنسێرتەكانی من، هیوادارم بتوانم لە نەورۆزدا بەمشێوەیە لە كوردستانیش كۆنسێرتێكی مەزن ساز بكەم».
جەمشید لە بارەی هونەرمەندە لاوەكانیشەوە دەڵێت: «هونەرمەندی لاوی زۆر دەنگخۆش و بەهرەمەندمان هەیە و من گوێ لە زۆربەیان دەگرم، گوتنی گۆرانییە كۆنەكان بە شێوازی نوێ زۆر باشە، بەڵام پێویستە رەسانەیەتیی خۆی لەدەست نەدات، لەگەڵ ئەوەشدا نوێكاری و نوێگەریی پێوە دیار بێت، بە بۆچوونی من، ئەمە سوودی بۆ میوزیك و گۆرانیی كوردی دەبێت، گەنجی ئێستا دەیەوێت گوێی لە كاری نوێ بێت، ئەمەش هاندەر دەبێت بۆ ئەوەی زیاتر گرنگی بە هونەری كوردی بدات.»