(نەوزاد محەمەد)، عاشقەكەی كوێستان
سرووشتی كوردستان دڵڕفێنە و هەمووشمان ئەم راستییە دەزانین، زۆر ئاسانە بە قسە بیڵێیت و بە بەر گوێی ئەم و ئەویدا بدەیت كە سرووشتی كوردستان جوانە، كێ دەتوانێت ئەم جوانییە راو بكات، كە ئەگەر ئێمە لە هەر شوێنێكی ئەم دنیایەدا بین، ئەو بتوانێت ئەو جوانییە بخاتە بەر دیدە و سەرنجمان؟
هونەری فۆتۆگرافی (وێنەگری) دەروازەیەكی گرنگە بۆ قسەكردن بە زمانی جوانی لە بارەی جوانیی كوردستان و هەروەها هەموو رواڵەت و دیاردەیەك كە بە چاو دەبیندرێت.

ئا/ تاریق كارێزی

نەوزاد محەمەد وێنەگرێكی ناسراوی باشووری كوردستانە و تا ئاستێكی بڵند بووەتە وێنەگرێكی پیشەگەر، ئەزموونی ساڵانی پێشمەرگایەتیی خۆی وەك دەرفەتێك قۆستەوە، دیمەنی سرووشتی چیا و گوندەواری كوردستان و خەڵكی گوندنشین، بە تایبەتی خەڵكی كوێستان زۆر سەرنجیان راكێشاوە، ژینگەی پڕ لە تەلیسمی جوانی و ژیانی نێو ئامێزی چیاكانی پڕ لە میهرەبانی و فەڕ و بەرەكەتی كوردستان، هەست و هۆشیان كەمەندكێش كردووە، بۆیە بە خولیایەكی زۆرەوە كەوتۆتە نێو دنیای وێنەگری (هونەری فۆتۆگراف)، خەرمانی كاركردنەكەی لە هەردوو ئاستی فۆتۆ و ڤیدیۆدا گەنجینەیەكی گەورەی ستاتیكا پێك دەهێنێت.
بەرنامەی (هەگبەی بنار) كە ساڵانێك بەر لە ئێستا، بۆ كەناڵی ئاسمانیی زاگرۆس ئامادەی دەكرد، ئنجا بەدەم ئاواز و گۆرانیی كەڵە سترانبێژانی كوردەوە لە شاشەی ئەو كەناڵەوە پەخش دەكرا، یادگە و یادەوەریی هەموومانی زاخاو داوە. ئاخر بە راستی مرۆڤ لە رێی ئەو بەرنامەیەوە بە گەلێك داب و نەریتی گوندەواری كوردستان و سرووشتی سیحراویی وڵات ئاشنا دەبێت، پاراستنی ئەو ڤیدیۆئەرشیفە دەوڵەمەندەی بەرنامەی (هەگبەی بنار) وەك سامانێكی نیشتمانی ئەركێكە كە نابێت نەوزاد محەمەد لە بیری بكات. تۆمار كردنی ڤیدیۆكان بە تەكنیكی تازە و تازەتر و دابەش كردنی (بە هەر شێوازێك بێت كە بەرژەوەندی و مافی خاوەنەكەی لەبەرچاو بگیرێت) بەسەر ناوەندەكانی هونەر و ئەرشیف لە كوردستاندا، ئەركێكی زۆر پیرۆزە.
(بە بن گڕی باوە گوڕگوڕەوە تا كەڤییەكانی مەرگەوەڕ) دوایین پیشانگای تایبەتی (ڤیدیۆ- فۆتۆ)ی نەوزاد محەمەد بوو، كە رۆژی 2/1/2020 لە هۆڵە مەزنەكەی ناوەڕاستی تەلاری سەنتەری رۆشنبیریی كەركووك كردییەوە و میوانێكی زۆری هونەردۆست سەردانی ئەو پیشانگایەیان كرد، میوانانی پیشانگاكە دەرفەتی ئەوەیان بۆ رەخسا كە بە دنیای كوێستانی كوردەواری و ژیان لە نێو چیا و سەختەنەكانی قووڵایی كوردستان ئاشنا بن. وێنەكانی پیشانگاكە چەندین گرتەی ئەو ژیانە پێشمەرگەی پارتە جیاجیاكانی كوردستان، خەڵكی رەوەند و دانیشتووی كوێستان، سرووشتی پڕ لە ئەندێشە و جوانیی ناوجەرگەی وڵاتی كوردەوارییان خستە بەر دیدەمان، هەروەها ئەو شتانە و گەلێك شتی دیكەی لە ئێمە پەنهان و شاراوە، بەڵام لە نێو چیاكانی كوردستاندا، ئاشكرا و لەبەر چاون، بە ڤیدیۆ خرانە بەردەمی میوانان.
نەوزاد محەمەد پێی وایە سرووشت هەر چەندی لە رووی جوگرافییەوە بەرەو سەختی بچێت، هێندە جوانتر و رەنگینتر و پڕ لە وردەكاری دەبێت. لە نێو چیادا ژینگە زۆر بەخشندە و دەوڵەمەند خۆی دەنوێنێت، مرۆڤی ئەم ژینگەیەش خەسڵەتی ژینگەكە دەگرێت، بۆیە لە گوندەكانی (شوان و ساڵەیی و شێخ بزێنی) لە كەركووك كە زێدی خۆیەتی، كامیراكەی كەمتر لە گەڕدایە، بابەتەكەش هەر ئەوە نییە ئەو عاشق و شەیدای كوێستان و چیاكانیەتی، بەڵكوو ئەو پێی وایە «جیاوازییەكی زۆر لە چەندین رووەوە لە نێو هەردوو ژینگەی كوێستان و گەرمیاندا هەیە»، بە تایبەتی كە كوێستان مرۆڤ بەرەو قووڵایی خاكی كوردستان دەبات، لەوێشدا هەموو ریشاڵ و سەرەباس و سەرەداوی هەر پرس و بابەتێكی كورد و كوردستان بە یەك دەگەن، ئەو قووڵاییەی كوردستان لە رووی فۆرم و دیمەن و رەنگ و ژیان و كولتوور و ئەتمۆسفیر و كەش و ژینگەوە، دنیایەكی فرە رەهەند دەخاتە بەر چاوی هەموو كەسێك، ئیدی مرۆڤی عاشق پتر لە هەر كەسێكی دی، مەست و حەیرانی دەبێت.