فیستیڤاڵی نێودەوڵەتیی دژ بە تیرۆر بۆ فیلمی كوردی، دوای بەڕێوەچوونی چوار خوولی یەك لە دوای یەك لە ساڵانی رابردوودا، بڕیارە لە یەكـی شوبات پێنجەمین خوولی ئەو فیستیڤاڵە بە هەماهەنگی لەگەڵ بەڕێوەبەرایەتی سینەمای هەولێر سازبكرێت.
ئەو فیستیڤاڵە ساڵانە بە ئامادەبوونی ژمارەیەكی بەرچاو لە میوانانی شارەكانی كوردستان و خوارووی عێراق و بەشێك لە وڵاتانی جیهان بەڕێوە دەچێت، ئامانجیش لە سازدانی فیستیڤاڵەكە گەیاندنی پەیامی ئاشتی و سڕینەوەی وشەی تیرۆرە لە هەرێمی كورستان، وەك ناوچەیەكی هاوپەیمان لەگەڵ وڵاتانی جیهان بۆ بەرەنگاربوونەوەی تیرۆر.


پشتیوان عەبدوڵا رێكخەری فیستیڤاڵەكە لەوبارەیەوە رایگەیاند: « لە ساڵیادی ئەنجامدانی یەكێك لە كردەوە تیرۆریستیە قێزەوەنەكانی مێژووی گەلەكەمان كە بەر لە (١٦) ساڵ لە هەولێر ئەنجامدرا، ساڵانە ئەم فیستیڤاڵە ساز دەكەین، پەیامی ئێمەی هونەرمەند و فیلمساز داكۆكیكردنە لەوەی كە ئەم رۆژە خوێناوییە لە نێوان گشت پێكهاتەكانی كوردستاندا بكەینە رۆژی خۆشەویستی و ئاشتی و پێكەوەژیان، هەروەها دەمانەوێ لەو كەشە سەقامگیرەی كە لە هەرێمی كوردستاندا بەدی دەكرێت، ساڵانە هاوشان لەگەڵ وڵاتە هاوپەیمانەكانی كوردستان ئەو فیستیڤاڵە ساز دەكەین، كە سەرجەم فیلمە بەشداربووەكانی ئەو فیستیڤاڵە باس لە نەهامەتی و رووی ناشیرینی تیرۆر دەكەن، كە ئێستا رووبەڕووی بەشێك لە وڵاتان بووەتەوە، ئێمەش دەمانەوێت لە رێگەی فیلمەكانەوە ئاڵای ئاشتی هەڵبكەین و بە جیهان بڵێین ئێمەش وەك گەلانی دنیا تامەزرۆیی ئەو سەقامگیرییەین، كە لە هەرێمی كوردستان هاتووەتە ئاراوە و بە فیلمیش بەرەنگاری تیرۆر دەبینەوە».
گوتیشی: «فیستیڤاڵەكە لە پایتەختی كوردستان ساز دەكرێت و چوار رۆژ دەخایەنێت و بە ئامادەبوونی میوانانی بیانی و عەرەب و شارەكانی دیكەی هەرچوار پارچەی كوردستان بەردەوامی دەبێت، پاشان لە رێگەی لێژنەیەكی پسپۆڕ لە بواری فیلمسازی و لێژنەی دادوەری كە لە چەند كەسایەتییەكی شارەزا و بە ئەزموونی (هەرێم، عێراق، سووریا، میسر و بەریتانیا) پێكهاتوون، خەڵات دەبەخشرێتە بەشداربووان، هاوكات رێز لە توانا و بەخششی ئەو هونەرمەندانەش دەگیرێت، كە ساڵانێكی زۆری تەمەنیان بە هونەری فیلمسازی بەخشیووە و ئێمەش لە چوارچێوەی چالاكییەكانی ئەو فیستیڤاڵە هونەرییەدان رێزیان لێ دەگرین».
ڕێكخەری فیستیڤاڵەكە ئەوەشی راگەیاند: لە خولی ئەم ساڵدا (٢٧) كورتە فیلمی جۆراوجۆر پێشكەش دەكرێن، وەك: درامی، دیكیۆمێنتاری و ئەنیمەیشن) كە جگە لە هەرێم و عێراق چەند وڵاتێكیش بەشدارن، لەوانە (سووریا، ئێران، میسر، مەغریب، تونس و بەریتانیا) و ژمارەیەك میوانیشمان دەبێت لە دەرەوە و ناوەوەی هەرێم، هەروەها دوو فیلمی درێژیش پێشكەش دەكرێن وەك پانۆراما، لە سەروبەندی فیستیڤاڵەكە چەند كۆڕێك دەربارەی گرنگیی بەرپەرچدانەوەی تیرۆر لە رێگای سینەماوە ساز دەكرێن، كە ئایا سینەمای عێراقی و كوردی و عەرەبی توانیویانە وەك پێویست رووبەڕووی هزری تیرۆر ببنەوە، یان نا، لەلایەكی دیكەوە ئەم ساڵ بڕگەیەكی دیكەمان هەیە كە بریتییە لە (تیرۆر و ئاوەدانی) بۆ ئەم مەبەستەش میوانەكان گەشتێك ئەنجام دەدەن بۆ بینینی ئاوەدانیی كوردستان وەك وەڵامێك بۆ رووبەڕوو بوونەوەی تیرۆر، فیلمەكان بە گشتی باس لە تیرۆر دەكەن، وەك هزر و كردار، بەشێكیان وەك سەرەتایەك بۆ سەرهەڵدانی تیرۆر دیاردەی توندوتیژیی كۆمەڵگە دەخەنە روو.
فیلمە كوردییە بەشداربووەكان
3 تیروریست لە تەمدا - دەرهێنانی فەرزین كەریم
بەفری گەرم- دەرهێنانی عەدنان عوسمان
رۆدا - دەرهێنانی خەیبەر رەفیق
٥٨ رۆژ - دەرهێنانی گۆنا ئەمین/ دیكۆمینتاری
سیاچەمانە - دەرهێنانی توانا حەمە/ دێكۆمینتاری
یاسەمین - دەرهێنانی سەرباز عەبدولڕەحمان
سوور و سەوز- دەرهێنانی سارا عوسمان
13 ی مای- دەرهێنانی تاریق تۆفیق/ دیكۆمینتاری
لێت دەگەڕێم بڕۆیت- دەرهێنانی سۆران سۆرانی
سیگۆشەكان- دەرهێنانی دڵنیا كاموسی
ئاوابوون- دەرهێنانی محەمەد سەید
لۆرینا دایكێ- دەرهێنانی محەمەد چەقماق/ دێكۆمینتاری
ود پێكەر- دەرهێنانی محەمەد مەرزانی
گێت باك - دەرهێنان خدر محەمەد
هەنگاو- دەرهێنان مازن شێربەیانی
یادێ- دەرهێنان شیرین جیهانی/ دیكۆمینتاری
چاوەڕێ بە - دەرهێنانی محەمەد شێروان
مای كەت- دەرهێنانی عیماد محەمەدانی
هەپ ئای پینگ- دەرهێنانی شیڤان عومەر
فری- دەرهێنانی سامی كاكە/ ئەنیمەیشن
ئایلان- دەرهێنانی جوبرایل ئەبوبەكر/ ئەنیمەیشن
بالانس- دەرهێنانی بارزان رۆستەمی/ ئەنیمەیشن
بلاك سۆڵس- دەرهێنانی جەواد موراد/ ئەنیمەیشن
پرسگەی مەرگ- دەرهێنانی نەسرین عادبدین/ دیكۆمینتاری. تەنیا نمایش
ئاوازی بێ كۆتا- دەرهێنانی سەركەش محەمەد
شێرۆ - دەرهێنانی رابەر ئیبراهیم
لێواری مەرگ- دەرهێنانی بیلال زەنگەنە.
فیلمە عەرەبییە بەشداربووەكان
كۆماری تەحریر - دەرهێنانی محەمەد نوری / دیكۆمینتاری
ئەكیتۆ- دەرهێنانی عەلی نوعمە
شوت - دەرهێنانی عەباس هاشم
دوا بانگەواز- دەرهێنانی مستەفا عەباس
شوێنبزر - دەرهێنانی شەمس ئەلزوحا
سەندرێلا- دەرهێنانی عەلی عادل/ ئەنیمەیشن
من كێم؟ - دەرهێنانی ئەنەس ئەلموسەوی/ ئەنیمەیشن
لبوە - دەرهێنانی ورود ئەلعەزاوی/ دیكۆمینتاری
گەڕانەوەی رۆح – دەرهێنانی موهەند ئەلتەیب
«علی عتبە الچفە»- دەرهێنانی یاسر حەمزە/ دیكۆمینتاری


ژیان لە درزی هاوێنەوە
(نەوزاد محەمەد)، عاشقەكەی كوێستان
سرووشتی كوردستان دڵڕفێنە و هەمووشمان ئەم راستییە دەزانین، زۆر ئاسانە بە قسە بیڵێیت و بە بەر گوێی ئەم و ئەویدا بدەیت كە سرووشتی كوردستان جوانە، كێ دەتوانێت ئەم جوانییە راو بكات، كە ئەگەر ئێمە لە هەر شوێنێكی ئەم دنیایەدا بین، ئەو بتوانێت ئەو جوانییە بخاتە بەر دیدە و سەرنجمان؟
هونەری فۆتۆگرافی (وێنەگری) دەروازەیەكی گرنگە بۆ قسەكردن بە زمانی جوانی لە بارەی جوانیی كوردستان و هەروەها هەموو رواڵەت و دیاردەیەك كە بە چاو دەبیندرێت.
ئا/ تاریق كارێزی


نەوزاد محەمەد وێنەگرێكی ناسراوی باشووری كوردستانە و تا ئاستێكی بڵند بووەتە وێنەگرێكی پیشەگەر، ئەزموونی ساڵانی پێشمەرگایەتیی خۆی وەك دەرفەتێك قۆستەوە، دیمەنی سرووشتی چیا و گوندەواری كوردستان و خەڵكی گوندنشین، بە تایبەتی خەڵكی كوێستان زۆر سەرنجیان راكێشاوە، ژینگەی پڕ لە تەلیسمی جوانی و ژیانی نێو ئامێزی چیاكانی پڕ لە میهرەبانی و فەڕ و بەرەكەتی كوردستان، هەست و هۆشیان كەمەندكێش كردووە، بۆیە بە خولیایەكی زۆرەوە كەوتۆتە نێو دنیای وێنەگری (هونەری فۆتۆگراف)، خەرمانی كاركردنەكەی لە هەردوو ئاستی فۆتۆ و ڤیدیۆدا گەنجینەیەكی گەورەی ستاتیكا پێك دەهێنێت.
بەرنامەی (هەگبەی بنار) كە ساڵانێك بەر لە ئێستا، بۆ كەناڵی ئاسمانیی زاگرۆس ئامادەی دەكرد، ئنجا بەدەم ئاواز و گۆرانیی كەڵە سترانبێژانی كوردەوە لە شاشەی ئەو كەناڵەوە پەخش دەكرا، یادگە و یادەوەریی هەموومانی زاخاو داوە. ئاخر بە راستی مرۆڤ لە رێی ئەو بەرنامەیەوە بە گەلێك داب و نەریتی گوندەواری كوردستان و سرووشتی سیحراویی وڵات ئاشنا دەبێت، پاراستنی ئەو ڤیدیۆئەرشیفە دەوڵەمەندەی بەرنامەی (هەگبەی بنار) وەك سامانێكی نیشتمانی ئەركێكە كە نابێت نەوزاد محەمەد لە بیری بكات. تۆمار كردنی ڤیدیۆكان بە تەكنیكی تازە و تازەتر و دابەش كردنی (بە هەر شێوازێك بێت كە بەرژەوەندی و مافی خاوەنەكەی لەبەرچاو بگیرێت) بەسەر ناوەندەكانی هونەر و ئەرشیف لە كوردستاندا، ئەركێكی زۆر پیرۆزە.
(بە بن گڕی باوە گوڕگوڕەوە تا كەڤییەكانی مەرگەوەڕ) دوایین پیشانگای تایبەتی (ڤیدیۆ- فۆتۆ)ی نەوزاد محەمەد بوو، كە رۆژی 2/1/2020 لە هۆڵە مەزنەكەی ناوەڕاستی تەلاری سەنتەری رۆشنبیریی كەركووك كردییەوە و میوانێكی زۆری هونەردۆست سەردانی ئەو پیشانگایەیان كرد، میوانانی پیشانگاكە دەرفەتی ئەوەیان بۆ رەخسا كە بە دنیای كوێستانی كوردەواری و ژیان لە نێو چیا و سەختەنەكانی قووڵایی كوردستان ئاشنا بن. وێنەكانی پیشانگاكە چەندین گرتەی ئەو ژیانە پێشمەرگەی پارتە جیاجیاكانی كوردستان، خەڵكی رەوەند و دانیشتووی كوێستان، سرووشتی پڕ لە ئەندێشە و جوانیی ناوجەرگەی وڵاتی كوردەوارییان خستە بەر دیدەمان، هەروەها ئەو شتانە و گەلێك شتی دیكەی لە ئێمە پەنهان و شاراوە، بەڵام لە نێو چیاكانی كوردستاندا، ئاشكرا و لەبەر چاون، بە ڤیدیۆ خرانە بەردەمی میوانان.
نەوزاد محەمەد پێی وایە سرووشت هەر چەندی لە رووی جوگرافییەوە بەرەو سەختی بچێت، هێندە جوانتر و رەنگینتر و پڕ لە وردەكاری دەبێت. لە نێو چیادا ژینگە زۆر بەخشندە و دەوڵەمەند خۆی دەنوێنێت، مرۆڤی ئەم ژینگەیەش خەسڵەتی ژینگەكە دەگرێت، بۆیە لە گوندەكانی (شوان و ساڵەیی و شێخ بزێنی) لە كەركووك كە زێدی خۆیەتی، كامیراكەی كەمتر لە گەڕدایە، بابەتەكەش هەر ئەوە نییە ئەو عاشق و شەیدای كوێستان و چیاكانیەتی، بەڵكوو ئەو پێی وایە «جیاوازییەكی زۆر لە چەندین رووەوە لە نێو هەردوو ژینگەی كوێستان و گەرمیاندا هەیە»، بە تایبەتی كە كوێستان مرۆڤ بەرەو قووڵایی خاكی كوردستان دەبات، لەوێشدا هەموو ریشاڵ و سەرەباس و سەرەداوی هەر پرس و بابەتێكی كورد و كوردستان بە یەك دەگەن، ئەو قووڵاییەی كوردستان لە رووی فۆرم و دیمەن و رەنگ و ژیان و كولتوور و ئەتمۆسفیر و كەش و ژینگەوە، دنیایەكی فرە رەهەند دەخاتە بەر چاوی هەموو كەسێك، ئیدی مرۆڤی عاشق پتر لە هەر كەسێكی دی، مەست و حەیرانی دەبێت.