لە هەفتەی ڕابردوو كەسێكی دەمامكدار بە ناوی (محەمەد موسا) بە چەكەوە هەڵیكوتایە سەر ماڵەكەی خانمە هونەرمەندی لوبنانی (نانسی عەجرەم), وە لە دواییدا بەدەستی (فادی هاشم)ی هاوسەری نانسی, ئەو دزە كوژرا, بەم هۆیەوە فادی لە دوای دەستگیركردنی ووتەكانی وەردەگیرێت و ئازاد دەكرێت,هێشتا پۆلیس لەو ڕووداوە دەكۆڵێتەوە و دۆسیەكە بە كراوەیی ماوەتەوە, وە لە ئێستادا پۆلیس دووبارە فادی هاشمی هاوسەری نانسی بانگهێشت كردووە بۆ ئەوەی دیسانەوە گوێبیستی ووتەكانی بێت .

لەم بارەیەوە پارێزەر ئەشرەف موسەوی ڕایگەیاند كە ئەو كەیسە دانەخراوە و بە ئاراستەیەكی دیكەدا دەڕوات, هەروەها داداگا داوای تەواوی گرتەی كامێرا چاودێرییەكان دەكات, وە هەڵدانەوەی تۆمار و لیستی پەیوەندییە تەلەفۆنییەكانی كوژراوەكە و نانسی عەجرەم و فادی هاشم و هەموو ئەو كەسانەی كەلە ماڵەكەدا كار دەكەن, ناوبراو دەڵێت كە هاوژینی كوژراوەكە ئەویش لە دادگادا ئامادە دەبێت و چەند زانیارییەك دەخاتە ڕوو, دەربارەی ئەوەی كە محەمەد موسا چەند جارێك بە هاوژینەكەی ووتوە لە ماڵەكەی نانسی كار دەكات و موچەكەی 800 دۆلارە و لە دواییدا كراوە بە 1000 دۆلار, هەروەها ڕایگەیاند كە بۆ ماوەی زیاتر لە مانگێك شوێنی مانەوەی بۆ دیاری كرابوو, وە بە هاوبەشی لەگەڵ كەسێكی دیكەدا لە ژوورێك دەمانەوە .

شایەنی باسە, دوای ئەم ڕووداوانە نانسی لە دەركەوتنێكیدا ڕایگەیاند كە كوژراوەكە كەسێكی نەناسراوە و لە ماڵەكەیاندا كاری نەكردووە و هیچ پەیوەندییەك نەبووە لە نێوانیاندا, وە ئەوەی لە تۆڕە كۆمەڵایەتییەكان بووەتە مایەی پرسیار و زۆر باسی لێوە دەكرێت, ئەوەیە كە ئەو دزە بە 16 فیشەك كوژراوە, وە بە پێی ڕاپۆرتە فەرمییەكان فیشەك بە بەشی پێش و پشتەوەی جەستەی كوژراوەكە بینراوە .