ئەسوەد فایق / کەرکوک

دوای ماندووبوون و هەوڵێكی زۆر بۆ ئەنجامدانی ئەم فیستیڤاڵە لە شاری كەركووك، خەرجی فێستیڤاڵ لەلایەن وەزارەتی رۆشنبیرییەوە بە هاوكاریی مەستی فلیم دابین كرابوو.
بەڕێوەبەرایەتیی رۆشنبیری و لاوانی كەركووك، گرووپی شانۆی هەوار، ناوەندی رێكخراوەكان سێ رۆژ شانۆیان لە كەركووك بەردەوام كرد بۆ گرووپەكان لە شارەكانی هەرێمی كوردستان و هەریەك لە وڵاتەكانی (تونس، ئوردن، سووریا، ئێران، عێراق)یش بەشدارییان تێدا كرد.
شانۆكاری بە توانای شاری مەریوان (موختار محەمەدی) خولێكی شەش رۆژەی بۆ كوڕان و كچانی شاری كەركووك رێكخست، بە مەبەستی فێربوونی شانۆی شەقام، پاشان هەربەو كچ و كوڕانەوە لە كۆتاڕۆژدا شانۆی (پاسكیلی) نمایش كرد، كە بووە جێگای خۆشحاڵیی نمایشكاران .
هونەرمەند (كەمال علی) كارێكی تایبەتی بە هاوكاریی هونەرمەندان (چیمەن خان) هاوسەری هونەرمەندی كۆچكردوو حوسێن میسری و هونەرمەند (شیلان عەلی) نمایش كرد و پێشكەشی رۆحی پاكی (حوسێن میسری) كرد .
سێ رۆژ نمایشی كوردی و عەرەبی و گۆرانی و میوزیك لە شەقامەكانی كەركووك بەردەوام بوو، چەندین پانێڵ و كۆڕی رەخنەیی لە چوارچێوەی فیستیڤاڵەكەدا رێكخران. لەو سێ رۆژەدا میوانەكان هەندێك جار بۆ ئازاری مرۆڤەكان دەگریان و هەندێك جاریش بۆ كۆمیدیا پێدەكەنین .
(حەمە سوار عەزیز، ئاشنا رەئوف، خاڵدار قەواڵی) زۆر بە دڵسۆزی هاوكار بوون بۆ سەرخستنی فیستیڤاڵەكە و زۆرماندوو بوون و شوێن پەنجەیان دیار بوو، پێویستە ئەرك و ماندووبوونیان بەرز بنرخێنین، چونكە ئەوان بەردەوام لە خەمی فیستیڤاڵ و سەركەوتنیدا بوون .
هەریەكە لە سەرۆك و سەرپەرشتیارانی فیستیڤاڵ و لێژنەكانی فیستیڤاڵ بەردەوام لەخەمی سەرخستنی فیستیڤاڵدا بوون، فیستیڤاڵەكە لە سێ رۆژدا تەواوی هونەرمەندانی كەركووك و كوردستانی كۆكردبووەوە، ئەوانەی ئامادەی فیستیڤاڵیش نەبوون، بە رۆح لەگەڵماندا بوون.
لەسێ رۆژی فیستیڤاڵدا هونەرمەندان تەنیا و تەنیا باسی فیستیڤاڵ و نمایشی شانۆكانیان دەكرد و هەست بە سەركەوتنی فیستیڤاڵ دەكرا، بۆیە دەتوانم بڵێم رۆژانی 28،29،30 مانگی یانزە جەژنی شانۆكاران و هونەرمەندانی كەركووك بوو،
لێرەوە پیرۆزبایی لە خۆم و تەواوی هونەرمەندان دەكەم بۆ ئەو سێ رۆژەی كە بە راستی جەژن بوو .
دادوەران
ئەوەی سەیرە پێنج دادوەرەكەی فیستیڤاڵ بە تەواوی خەون و خەیاڵەكانی ئێمەیان لە تاریكیی خۆیاندا خنكاند، كە بریتی بوون لە (دڵشاد مستەفا، ئاسیا كەمال، كەریم خاوەری، عارف مەعروف) ئەمانە جگە لە (كەریم خاوەری) كەئەزموونێكی باشی لەشانۆی سەرشەقامداهەیە، ئەوانی دی بڕواناكەم رۆژێك لە رۆژان كارێكی شەقامیان كردبێت .
ئەوەی جێگەی سەرنجی منە یەكێك لە دادوەرەكان كە بڕوانامەی دكتۆرای هەیە، دەیگوت گۆرانی و میوزیك نابێت لە شانۆی شەقامدا زۆربێت، لەكاتێكدا شانۆی شەقام خۆی لە خۆیدا ئاهەنگسازییە، كاتێك بڕیاری لیژنەی دادوەران خوێندرایەوە من شۆك بووم، خەڵات بە چەند نمایشێك درا كە بەڕاستی ئەوانە شانۆ نەبوون، رەنگە بیرۆكەكەیان جوان بووبێت، بەڵام خۆ بیرۆكە ئەگەر لە شێوازی شانۆدا بەرجەستە نەكرێت و هەروەك شەقام نمایش بكرێت، ئەوە شانۆ نییە. بەداخەوە بۆ رازیكردنی هەندێك لە كەسەكانی فیستیڤاڵ كە ئەو كەسانە گلەییان لە فیستیڤاڵی شانۆی كەركووك هەبوو، گوایە فیستیڤاڵی هۆڵ بووە، هەندێك كەسیش گلەییان لە فیستیڤاڵی شەقامی دەربەندیخان هەبوو، كە بە رای ئەوان دادوەری ئەو دوو فیستیڤاڵە خەڵكی توندڕەوی كوردبوون، بۆیە خەڵاتیان بەوان نەداوە، لێرە لە پێناو رازیكردنیان خەڵاتیان بە چەند شانۆیەك دا، كە شایستە نەبوون .
ئەوەش گرنگ نییە ئەوەی بووە جێگەی گلەیی من و بینەران ئەوەیە كە شانۆی (سانتی مەتر) لە دەرهێنانی سەید سۆران و نواندنی موختار مەحمەدی كە كاری گرووپی مەریوان بوو، ئەوان خاوەنی سێ خەڵاتن لە فیستیڤاڵەكانی (فەجر لە تاران، فیستیڤاڵی مەریوان، فیستیڤاڵی دەربەندیخان) كەچی لێرە لیژنە بلیمەتەكەی فیستیڤاڵی كەركووك بە كاری شەقامیان نەزانیوە.
بە راستی سەیرە یەكێك لە دادوەرەكان پێی وتم: «ئەم جۆرە نمایشەكە كاتەكەی زۆرە تەنیا بۆ ئێران دەبێت، لێرە شانۆی شەقام وانییە»، ئەو نازانێ فیستیڤاڵی شانۆی شەقام لە تارانەوە هاتۆتە مەریوان و لەوێشەوە پەڕیوەتە ئەم دیو، لە دەربەندیخان و پاشان هاتۆتە كەركووك، سەیر بوو ئەو دەیوت: «چوویتە شاری كوێران دەست بە چاوتەوە بگرە». دادوەرێكی دیكە لە كاتی دابەشكردنی خەڵاتەكە لە سەر شانۆ بە ئاشكرا و بێ دوودڵی وتی: «داوای لێبووردن دەكەین شانۆ هەبوو شایستەی خەڵات بوو، بەڵام لەبەرئەوەی سیاسی بوو، لەبەر بارودۆخی تایبەتی كەركووك خەڵات نەكران».
كەواتا ئێمە هەمیشە خۆمان بچووك دەكەینەوە، ئەوە تاوانی ئێمەیە كە كەس بە گەورەمان نازانێت و هونەریشمان بە دەردی سیاسەتەكەمان چووە، بۆیە دەڵێم من بەردەوام لە حوزووری ستافی (سانتیمەتر) دەوەستم و لە خزمەت (موختار محەمەدی و سۆران)دا دەبم، ئەوانیش با خەڵات و دكتۆرییەكەیان بەرنەوە بۆ جەهەنم.