بڕیارە گۆرانیبێژو ناوداری مەغربی (سەعد لمجەرد), بچێتە بواری نواندن و یەكەم زنجیرە دراما بەرهەم بهێنێت, لەم بارەیەوە(زیاد شوەیری) بەرهەمهێنەری ئەم كارە هونەرییە ڕایگەیاند كە ئەم بیرۆكەیە لە ڕابردوودا كاری لەسەر كراوە و دواخراوە, بەڵام لە ئێستادا كار لەسەر جێبەجێكردنی ئەو زنجیرە درامایە دەكرێت, هەروەها ڕایگەیاند (كارت اخطر) كە ناونیشانێكی كاتیی ئەم زنجیرە درامایەیە مانگی شوباتی 2020 دەستدەكرێت بە كاری وێنەگرتنی .

ناوبراو دەڵێت, لەپاڵ سەعد لمجەرد چەند ئەكتەرێكی دیكەی وڵاتانی سووریا و لوبنان و میسر ڕۆڵی تێدا دەبینن, وە ئەم بەرهەمهێنەرە ئاماژەی بەوەدا كە ئەو دەخوازێت كاری وێنەگرتنەكە لە لوبنان ئەنجام بدرێت, بەڵام بەهۆی بارودۆخی وڵاتەكەوە هێشتا دیار نییە .

دوای كێشەو دادگاییەكانی لە وڵاتی فەرەنسا, ئەم گۆرانیبێژە دیسانەوە لە 18ی دێسەمبەر لە سعودیە كۆنسێرتێكی گۆرانی سازدەكات, بەهاوبەشی لەگەڵ هەریەك لە خانمە گۆرانیبێژی لوبنانی مێریام فارس و (گروپی مەیامی)ی كوەیتی گۆرانییەكانیان دەچڕن .