لە مێژووی هونەری شێوەكاریی باشووری كوردستاندا، ئازاد شەوقی و جەوهەر محەمەد عومەر، سرووشت بابەتی هەرە سەرەكیی بەرهەمهێنان و كار كردنیانە. لەم بوارەدا هەر یەكەیان خاوەن ستایل و شێوازێكی تایبەتی خۆیەتی، كە سەرەنجام گوتارێكی تایبەتمەندی دیدەییان گەڵاڵە كردووە.
ئا/ تاریق كارێزی


د. عەلی حوسێن، هونەرمەندێكی شێوەكاری كەركووكە، لە دوایین پیشانگای تایبەتی خۆی بە ناونیشانی (ئەڤین لە سیمفۆنیای رەنگەكاندا) كە لە سەرەتای تشرینی دووەمی ئەم ساڵ لە هۆڵی میدیا لە شاری هەولێر كردیەوە، ستایلێكی دیكەی كاركردن لە بابەتی سرووشتمان پیشان دەدات.
رەنگە ناونیشانی پیشانگاكە تا رادەیەكی زۆر هێما بێت بۆ جۆری كاركردنی هونەرمەند و وەگەڕخستنی فاكتەری رەنگ وەك رەگەزی سەرەكی لە ئەفراندنی سەرجەم تابلۆكانی ئەو پیشانگایەدا. سرووشت بابەتی سەرجەم تابلۆكان بوو، لە نێو سرووشتیشدا ئەو گوندی كردووەتە جەمسەری كار كردنی، گوند لە یادەوەری و یادگەی بەشی هەرەزۆری نەوەكانی رابردووی كوردستاندا نەخشێكی كارای هەیە. زۆربەی دەستەبژێری نەوەكانی رابردوو، یان بە رەچەڵەك دەچوونەوە سەر خانەوادەی گوندنشین، یان ئەوەتا بەشێكی ژیانی خۆیان چ وەك پێشمەرگە، یان وەك مامۆستا لە گونددا بەسەربردووە. جگە لەوەی گوند سەبارەت بە كۆمەڵگەی كوردەواری ژینگەیەكی رەسەنە، وەك هەڵگری هەموو سیماكانی شارستانییەتی كورد لێی دەڕواندرێت. هەروەها وەك ژینگەیەكی پاكیزە و بێگەردیش هەستی جوانخوازانەی هونەرمەندانی بە لای خۆیدا راكێشاوە، ژیانی ساكار و پڕ ئەشك تەژی لە داب و نەریتی باب و باپیران، هەموو ئەمانە رەهەندێكی ئەفسانەییان بە گوندی كوردەواری بەخشیوە.
سەرچاوەی خولیا بوونی د. عەلی بە ژینگەی گوند رەنگە تێكەڵەیەك بێت لە سەرجەم ئەو فاكتانەی لە بڕگەی پێشوودا ئاماژەمان پێ كردن، لە پاڵ ئەوەشدا نیگار هونەرێكە زۆر بە فراوانی دەكەوێتە بن كاریگەریی نەستەوە. ئەوەی پتر بۆ هەر هونەرمەندێك بە ئەفراندن دەژمێردرێت، ئاخۆ لە چ گۆشەیەكەوە لە سرووشت دەڕوانێت، پاشان چۆن دیدی خۆی و گوتاری ستاتیكاییانەی خۆی دەخاتە روو. لێرەدا د. عەلی رێچكەی خۆی دیاری كردووە، كە لە ساغكردنەوەی بەرهەم و گەڵاڵەكردنی گوتاری دیدەییانەی خۆی و چەسپاندنی رەگەزەكانی تابلۆدا، خۆی دەنوێنێت.
لە هەر شرۆڤەیەكدا بۆ تابلۆكانی هونەرمەند، بە تایبەتی لەم پیشانگایەدا، دەبێ بڵێین گوند بۆ خۆی بووەتە بابەتی هەرە سەرەكیی هونەرمەند، ماڵی گوندنشینان (بە شێوازی دێرین و رەسەن و رابردووی گوندی كوردەواری) بووەتە چەقی كار كردنی، سرووشتی دوور و نزیكی دەوروبەری گوند، لە پەراوێزی كاركردنی هونەرمەنددان. ئەو ئەگەرچی هەندێك جار لە كێشانی دۆخی ئاوەدانیی گوند و خانووی گوندنشیناندا، تا ئەندازەیەك لە شێوازی ئازاد شەوقی نزیك دەبێتەوە، بە تایبەتی لە بەكارهێنانی رەنگ و چڕكردنەوەی دیمەنی خانووەكان، بەڵام د. عەلی گوند هێندە زاڵ دەكات، كە ئیدی رەگەزەكانی دی نەخشی زۆر كەمیان لە گەڵاڵەكردنی گوتارەكەیدا دەبێت. ئەوەش جێی سەرنجە كە زۆر بوێرانە رەنگی داناوە، یەكبین و راستەوخۆ كاری كردووە، دوودڵ نەبووە لە كۆكردنەوەی هەمەجۆریی رەنگ بە تەك یەكەوە، واش پێدەچێت ئەزموونێكی باش و دوور و درێژی لە بەكارهێنانی رەنگدا هەبێت، بۆیە سەمفۆنیای ئەڤینی خۆی بەرانبەر بە ژینگەی گوندەواری كوردستان، باش ژەنیوە، هەڵبەت لە داڕشتن و داگرتنی پەڵەی رەنگ، بە تەرزی باوی سەردەم كاری كردووە، بەڵام لە تێكچڕژاندنی رەنگ و فۆرم و زاڵ بوون بە سەر ئەندازەی تابلۆدا، شەقڵی خۆی دیاری كردووە و جێ پەنجەی خۆی بە تەوێڵی تابلۆدا نەخشاندووە.
شتێك كە زۆر سەرنج رادەكێشێت، د. عەلی فڵچەی خۆی ئازاد كردووە، گوێی لەوەش نەبووە لە سەر كام رەنگی سەر پالێتەكەی گیرساوەتەوە، چونكە جیهانی گوند رەنگستانێكی بێ كۆتاییە، لە نێو سەمفۆنیای ئەو ژینگەیەدا، بە لۆژیكی گوتاری دیدەییانەی هونەرمەند، هەموو رەنگێك جێی دەبێتەوە، هەموو رەنگێك قابیلی ئەوەیە لە هەر شوێنێك دابەزێت، ترسێك لە ئارادا نییە، چونكە مایسترۆیەك ریتمی جووڵەی رەنگ و فۆرم ئاراستە دەكات، بۆیە لەنگی روو نادات، فڵچەش تا كۆتاییهاتنی تابلۆ درێژە بە ئازادییەكەی خۆی دەدات.