جەوهەر محەمەد عومەر، شای نیگاری سرووشتە، ئەمڕۆ نا، بەڵكو ساڵانێكە ئەم راستییەی سەلماندووە. سیحری جوانی و شكۆ، وردەكاری و شەبەنگی رەنگی سرووشتی لە زەینی خۆیدا كێشاوە (بگرە جێگیر كردووە)، بۆیە كە دەست دەداتە كەرەستەی كاركردنی، ئیدی سرووشت بە هەموو وردەكارییەكی خۆییەوە ئامادە دەبێت، ئینجا بە سەر تەختایی تابلۆدا دەنەخشێ.

ئا/تاریق كارێزی

ویستم ئەو بڕوایەی خۆم تاقی بكەمەوە، كە تابلۆی ئەم نیگاركێشەی كوردستان تایبەتە و وابەستە بە ژینگەی خاكی كوردستانە. لە ئینتەرنێت لە هەردوو بواری سرووشت و چیادا، بە دوای تابلۆدا گەڕام. بەڵێ، بە هەزاران تابلۆ هاتنە سەر شاشەی لاپتۆپەكەم، هیچ تابلۆیەكم نەدی وەك ئەوانەی جەوهەر محەمەد عومەر بن.
ئەمە چ دەگەیەنێت؟
لە چوارچێوەی ئەم دوو خاڵەی دادێن، دەكرێ لە كرۆكی وڵامی ئەو پرسیارەی پێشوومان نزیك ببینەوە:
یەك: ئەم هونەرمەندەی كوردستان شێوازێكی تایبەت بە خۆی لە نیگاری سرووشتدا ئەفراندووە، ئەم شێوازە زادەی كاری دەیان ساڵی ئەوە، دواجار دەكرێ وەك رێچكەیەكی كوردی لە هونەری شێوەكاریدا لێی بڕوانین.
دوو: سرووشتی كوردستان تایبەتمەندیی خۆی هەیە، بە سرووشتی هیچ وڵاتێكی دی ناچێت، ئەمەش دەرفەتی ئەوەی بە هونەرمەند داوە، فۆرمێكی تایبەت، رەنگی تایبەت و تانوپۆی تایبەت بە تابلۆكانی بدات.
بە بڕوای من، هەر تابلۆیەكی ئەم هونەرمەندە دارای ئەوەیە یەك وتاری لە سەر بنووسرێت، كە ئەو دەرفەتە نییە، قسەكردنمان بۆ چەند لایەنێكی گشتیی بەرهەمەكانی تەرخان دەكەین. با ئەوەشمان لە بیر نەچێت كە هەر تابلۆیەكی بە پێی گۆشە و كەنارەكانی، ئەوەی لەباردایە بكرێتە چەند تابلۆیەك.
تابلۆكانی ئەم هونەرمەندە (بە گشتی) دابەش دەبنە سەر سێ رووبەری ئاسۆیی (ئاسمان، چیای بڵند، لاپاڵ و دەشت و دۆڵ). ئاسمان بە هەور و هەتاو، بە هارمۆنیایەكی ئارامی هەمەجۆر و رەنگ پڕ دەكاتەوە. دووەمین ئاستی كار كردنیشی چیایە، چیا لە نزیكدا تێر رەنگ و لە دووردا تەماوی خۆی دەنوێنێت، رووبەری چیاش بەفر و سەوزایی و شاخی رەق و دارستان دەیتەنێتەوە. لە سێیەمن ئاستدا ئیدی وردەكاری دەست پێ دەكات، رواڵەتەكانی ئاستی سێیەم زۆرن، بۆ نموونە گوند، كانیاو، جۆگە، گیانداران، دار و درەخت، گۆل، رێ و رێچكە و شتی دیكەش.
روونی لە جیاكردنەوەی فیگەرەكان بەرجەستەیە، كە تێكڕا لە نێو یەك بازنە (سرووشت)دا دەخولێنەوە، واتە هەردەم (چیا، لاپاڵ، شیو، ئاسمان، گوند و گەلێك شتی دیكەی ورد) لە تابلۆكاندا دووبارە دەبنەوە، بە رەنگی تێر و تیرە زۆر گەش خۆ دەنوێنن، ئەگەرچی ساتەوەختێ كە دۆخی تابلۆی ئەم هونەرمەندە دەیخاتە روو، هەردەم رۆژە، بە زۆرییش دانی بەیانی، یان نیوەڕۆیە، بۆیە دیمەنی تابلۆ روون خۆی دەنوێنێت، هەندێك جاریش دیمەنی دەمەو رۆژئاواش لە تابلۆكانیدا دەبینی، كە دیمەنی تابلۆ تارمایی تاریكییەكی كەم باڵی بە سەردا كێشاوە، بەوەی لەم دۆخەدا ئاراستەی تەماشاكردن بەرەو رۆژئاوایە، ئیدی لە تابلۆی لەم جۆرەدا تارمایی تاریكی باڵادەست دەبێت. هەردەم تابلۆكان كەش و ژینگەیەكی پاك و بێگەرد و بێ تۆز پیشان دەدەن، ئەمە خەسڵەتی رەسەنی وڵاتی كوردەوارییە، كە هێشتا دووكەڵ و پاشماوەی كاربۆن بێگەردییەكەی نەڕووشاندووە، بە تایبەتی لە نێو چیاكانی كوردستاندا.
هونەرمەند هێندە وردەكارانە دەچێتە نێو دیمەنی سرووشتەوە، شفرەش بۆ گواستنەوەی رەنگ لە پالێتەوە بۆ سەر رووبەری تابلۆ بەكار دەهێنێت، بەم جۆرە بە سەدان بەڵگەنامەی ستاتیكی دەخاتە روو، هەموو ئەو بەرهەمانەش دەبنە رێچكەیەك لە گوتاری دیدەیی ناسنامەی جوگرافیا و، سرووشتی نیشتیمانێك دەنوێنن.
پێشتر گوتبووم، دوو رێچكەی (تەكین) و (سنە) لە مێژووی هونەری شێوەكاریی كوردستاندا جێی خۆیان كردووەتەوە، رێچكەی تەكین لە باكوور و ئەوەی سنەش لە رۆژهەڵات (رێچكەی جەوهەر)یش لە باشوور دێتە پاڵیان. بە دڵنیاییەوە ئیدی بە كردنەوەی سێزدەمین پیشانگای تایبەتی خۆی، جەوهەر محەمەد عومەر دەبێتە خاوەن رێچكەیەكی تایبەتی هونەر، كە سرووشتی كوردستان كرۆك و ناوەرۆكیەتی. بەكار هێنانی رۆن و رەنگ، بە چڕی و رەچاوكردنی بنەمای ئەكادیمی (روانگە، توێكاری. هتد) لە هونەری نیگاردا، بازنەی كار و مانۆری ئەم (رێچكەی جەوهەر)ـەیە.