خۆشەویستی بۆ خاك و نیشتیمان و شەڕی ئەم دواییەی ڕۆژئاوای كوردستان, وای لە بەشێكی زۆری گۆرانیبێژ و هونەرمەندان كرد هەڵوێست وەرگرن بەرامبەر بەو داگیركارییەی توركیا, وە كارە هونەرییەكانیان دوابخەن لە بڵاوكردنەوە و كۆنسێرتەكانیان بوەستێنن .

بەم هۆیەوە خانمە هونەرمەند (چۆپی فەتاح), لە ئەكاونتی خۆی لە تۆڕی كۆمەڵایەتی ئانستگرام وێنەی شەڕڤانێكی بڵاوكردەوە, وە ئاماژەی بەوە كردووە كە ئامادەكاری تەواو كرابوو بۆ ئەوەی لە 14-10-2019 لە قامیشلۆ بەشداری لە فیستیڤاڵێك بكرادایە, بەڵام وەكو پشتیوانی لە شەڕڤانانی ڕۆژئاوا و هاوخەم و ئازاری هاوڵاتیانی سڤیلی ئەو ناوچەیە, چۆپی ئەو كۆنسێرتەی هەڵوەشاندەوە .

هەروەها چۆپی لە دوای ڕێز و نەوازشی بۆ گیانی پاكی شەهیدان دەڵێت: سەركەوتن هەر بۆ گەلە, هیوادارم شەرەفی ئەوەم پێ ببەخشن لە ئاهەنگی سەركەوتندا بەشدار بم .