گەلەریی بە ناوبانكی نیویۆرك (jak shainmany) مێوانداری تابلۆكانی خانمە نیگار كێشی كورد (هەیڤ قارەمان) دەكات, پێشانگاكە لە ژێر ناونیشانی(مرۆڤێكی تەواو نا)یە, ئەمە دەبێت بە چوارەم جار كە ئەم خاتوونە لەم گەلەرییە بەشداری بكات, لە خوێندنەوەی تابلۆكانی هەیڤ قارەمان ئەزموون و ژیانی پەنابەرێتی ئافرەتانی ئەم ناوچەیە دەردەكەوێت .

هەیڤ قارەمان لە دایكێكی كورد و باوكێكی عەرەب لە شاری بەغدا لە ساڵی 1981 لە دایك بووە, لە كاتی جەنگی یەكەمی كەنداو لە ساڵی 1991, لەگەڵ دایكی ڕوو دەكەنە كوردستان و لە دواتر ڕوو دەكەنە وڵاتی سووید, هەیڤ لەو بارودۆخە توانی سەرتایەكی تر درووست بكات, كە لەناكاو چووە وڵاتێك جیاواز لە زمان و فكر و بیركردنەوە, بە خۆگونجاندن لە گەڵ ئەو كۆمەڵگەیە هەیڤ توانی هەموو شتێك لە خۆی بگۆڕێت, بەڵام هونەرەكەی بەبیری دەهێنایەوە كە ئەو كێیە, ئافرەتێكە و دەبێت خۆڕاگر بێت تا هێزی خۆی كۆ بكاتەوە و بەرامبەر ئاستەنگەكانی ژیان بووەستێتەوە .